Shillong, Naitung 28: Na ka ophis treikam jong ka Joint Chief Executive ophisar ka Meghalaya Ropeway Development Authority, Tourism Department, sorkar Meghalaya, kala shim iaki lad ki lynti ban kyntiew iaka kam jngohkai pyrthei, pynsuk iaka leit ka wan ki briew bad ban pynmih kam pynmih jam na ka bynta ki trai shnong.
Kane ka ropeway kan iada iaka mariang, kan jngai kumba 896 metre bad kan don 13 tylli ki cabin ba la shna katkum ki rukom treikam bad rukom shna jong ka ri bilat. Ka jinglut baroh ka long T. 151 klur.
Ka skhim kala ioh iaka jingbit na ka bynta ka khlaw na ka Ministry of Environment, Forest and Climate Change ha ka 24 tarik Risaw 2024 bad kala ioh ruh iaka jingbit na ka bynta ka Scheduled Tribes and Other Traditional Forest Dwellers Act, 2006. La ioh iaka jaka da ka jingiasoi Land Lease Agreement bad ka Raid Laban Dorbar Pyllun ha ka 16 tarik Kyllalyngkot 2023.
La ioh jingbit na ka Forest Department ban pom iaki 544 tylli ki dieng bad la dep thoh bad pom iaki katkum ka rukom. La ioh iaka NOC na ki bor ba dei peit jong ka jaka kad liengsuin ha ka 24 Iaiong 2023 na Air Force Station, la ioh ha ka 26 tarik, Naitung 2023, katba ka NOC na Indian Army, la ioh ha ka 07 tarik, Nailar 2023.
Ka thong jong ka sorkar ka long ban thmu ban pynneh iaka jingiada iaka mariang ryngkat bad ka roi ka par. Ka thong ba kongsan ka long ban pynneh iaka jingbha ka mariang ka jylla bad ban pynioh lad kamai iaki paidbah lyngba ka kam jngoh kai pyrthei.
