Shillong, Naitung 31: U nongialam ka seng KSU u samla Laitphar Syngkrem u la ong ba dei ki pulit kiba la khang lynti ia ki dkhot ka seng KSU bad ki paidbah ban ia shim bynta ka jingpynsngap paidbah ia ka Shree Cement Private Limited, u wei na ki nongialam ka seng KSU u la phone sha ki Deputy Commissioner bad Superintendent ki pulit ka East Jaintia Hills District ka phone ka pah hynrei kim treh ban shim.
Kane ka jingshah khang lynti jong ki dkhot ka seng ka long ha Umpleng, dei ha kane ka jaka ba la syrtap da ki pulit ban khanglad ia ki dkhot ka seng bad ki paidbah, kane ka jingbym shim phone u DC bad u SP ka kren shai ba ki ruh ki don ha ka liang jong ka Shree Cement, lada kim don liang kumno kim treh ban jubab.
La ong ba ha ka 28/Naitung/2026 kala don ka jingiakren bad u DC bad SP bad ka KSU kala ai da ka jingthoh ban ai lad ia ki paidbah ban poi sha katei ka jaka ba don ka jingsngap paidbah ha kaba iadei bad ka Shree Cement Private Limited hynrei ka long da khongpong.
La iohi ia ka jingshah kawang lyer pynsat khmat, ka jingmynsaw ki kali bad wat ka kali Ambulance ruh kala sah pynjulor bad la tih ruh ia ka surok ban nym ialad ia ki briew ban poi sha ka jaka ba pynlong ia ka jingsngap paidbah bad kila don ki briew kiba la kawang maw ia ki briew kiba mut leit sha ka jingpynsngap paidbah.
