Shillong, Naitung 31: U President ka seng Hill State People’s Democratic Party (HSPDP) Youth Central Body, u samla Korbarlang Syiemlieh bad u Secretary ka seng, u samla Pynshai Joel Dkhar, kila pynrem jur iaka jingpyndonkam ban siat ia ki lyer pynsat khmat pyrshah iaki paidbah ba pynlong iaka jingialang ha Umpleng, East Jitnia Hills District.
Ka long kaei kaei kaba ktah ban iohi ba ki paidbah ba lui lui, khamtam ka kmie bad la u khun, kiba la mynsaw jur hadien ba kila shah kawang ha ka lyer pynsat khmat synreit da ka tear gas katba ki dang dawa ia la ka hok jong ki.
Kum kine ki jingjia ki dei ki jingjia kiba la bun ki jingkylli shaphang ka jingiada iaka hok jong ki paidbah bad ka jingpyndonkam da ka bor ha kaban teh lakam ia kum kane ka jingiakhih ba iaid jai jai.
Na ka liang ka HSPDP State Youth Wing, kila kyrpad sha ka sorkar Meghalaya ba kin shimkhia mar mar ia kane ka jingjia bad ban hukum iaka jingpeit bniah kaba laitluid, kaba khuid bad kaba shynna halor kiei kiei kiba jia. Lada don kano kano ka jingleh da ka bor, kito kiba donkti ha kane ka jingjia ki dei ban shah pynshitom katkum ka ain.
Ka seng samla ka HSPDP State Youth Wing ka khot ia baroh kiba dei peit ban sngap iaki rynsan paidbah bad ka jingmut bad ka jingkynmaw iaka hok bad ka jingbha jong ki nongshong shnong ka Meghalaya.
Ka seng ka kyntu ruh ia baroh ki bor ba dei peit ban da bniah iaka shongsuk shongsain bad ban iada iaki kynthei, ki khynnah bad ki tymmen ha ki por ba don ki jingiakhih paidbah.
Ha kajuh ka por, ka kyntu ia baroh ki nongshong shnong ban iaid beit ha ka lynti ka jingsuk bad ban pynneh iaka ain khlem da pynkulmar ha ka por ba pynpaw iaki jingujor bad ki jingdawa jong ki.
