New Delhi, Nailur 23: Ka President jong ka ri India, ka Droupadi Murmu, mynta ka sngi ka la sam ia ki khusnam National Film Awards kaba 72 bad ka la kitbok kitrwiang ia baroh kiba la jop ia ki khusnam namar ka jingtbit bad ka jingtrei shitom jong ki.
Ka la ong ba ka kam shna phlim ka dei ka kam kaba donkam ia ka jingiatreilang bad ka la kyntu ia ki nongjop khusnam ba kin ai ka jingkitbok kitrwiang jong ka sha ki kynhun jong ki kiba la noh synniang sha ka jingjop khusnam jong kine ki phlim.
Ka President ka la kitbok kitrwiang ia u nongjop ia ka khusnam Dadasaheb Phalke Award Anant Nag na ka bynta ka jingnoh synniang jong u sha ka kam pynbyrnia.
Ka President ka la ong ba ka kam shna phlim jong ka India ka pyni ia ka jingiar jong ki ktien jong ka ri, ki dustur, ki jingangnud bad ki jingeh. Ka la iaroh ia ka jingjied ia ka Ekta Nagar ban pynlong ia ka National Film Awards, kaba long ka dak jong ka jingiatylli ha India.
Da kaba ong ba ka dei ban don ka burom bad ka jingshngain jong ka imlang sahlang ha ka ioh ka kot na ki kam pynbyrnia, ka President ka la ong ba ki nongtrei, ki nongsaindur bad kito kiba shem jingeh ha ka kam saindur ki dei ban ioh ia ka burom bad ka jingshngain ha ka imlang sahlang. Ka la ong ruh ba ki dei ban don ki longkmie ha baroh ki kynhun jurib ban pynthikna ia ka jinglong ryntih.
Da kaba kdew sha ka bor jong ki briew ba pawnam, khamtam ha kaba iadei bad ki khynnah bad ki samla, ka President ka la kyntu ia ki ba kin kyrshan ia ka jingmyntoi jong ka rukom im kaba ryntih bad ba kin ym kyrshan ia ki kam kiba ktah ia ka koit ka khiah.
Ka President ka la ong ba ka jingbha jong ki phlim kiba la shna ha ka ri ka pynkhlain ia ka jingngeit jong ka ba ki phlim jong ka India ki lah ban long kum ki nuksa ia ka pyrthei.
Ka jingim kaba dap da ki khana, ka kam kaba iar ha ka jingshna phlim: La pynkup burom ia u Anant Nag da ka khusnam Dadasaheb Phalke Award
Haba ka President jong ka ri India, ka Droupadi Murmu, ka la ai ia ka khusnam Dadasaheb Phalke Award 2024 ia u Anant Nag, kane ka la long kum ka jingrakhe ia ka jingim jong u ha ka kam iathuh khana bad ka kam shna phlim. Kane ka la long kum ka jingithuh ia ki kam ba sah nam jong u bad ka jingnoh synniang jong u da ki phew snem sha ka kam shna phlim jong ka India.
Haba u la pdiang ia kane ka khusnam da ka jingsngewrit, u Anant Nag u la ai jingsngewnguh na ka bynta ki briew bad ki jingshem jong u kiba la don bynta ha kane ka jingiaid lynti jong u.
Haba kren shaphang ki snem ba u dang sdang trei ia kane ka kam, u Anant Nag u la ong ba u la heh la san ha kawei ka ashram shuwa ba la phah ia u sha Mumbai, ha kaba u la ioh ka lad ban iadon bynta ha kawei ka prokram. Ka kam ak ka la long ka nongrim jong ka kam kaba u la trei, bad nangne u la iashim bynta ha kumba 50 tylli ki prokram shuwa ba un rung ha ka kam ak phlim. Hadien kane u la ioh lad ban trei ha ki phlim, ba kynthup ia kito kiba la shna da u nongshna phlim uba pawnam, u Shyam Benegal.
U Anant Nag u la ong ba u la jied ia ki kam shna phlim Kannada bad u la pynlong ia ka Bengaluru kum ka karmabhoomi jong u. U la ong ba u la ioh ia ka khusnam Padma Bhushan na ka President ha une u snem ba la dep bad u la ong ba u sngewnguh shisha ban ioh sa ia ka khusnam Dadasaheb Phalke Award na ka President mynta u snem.
Pdiang ka Gujarat ia ka National Film Awards, Kane ka prokram ha Gujarat ka la long ka dak jong ka bynta kaba thymmai ha ka jingiaid lynti ka National Film Awards.
U Lat jong ka jylla Gujarat Acharya Devvrat u la ai jingsngewnguh ia ka Tnat Information and Broadcasting kaba la sdang ia ka kam ban pynlong ia ka National Film Awards shabar jong ka Delhi, bad u la ong ba ka Gujarat ka sngew sarong ba la pynlong ia kane ka prokram ha Ekta Nagar, Kevadia, kaba don ka jingiadei bad ki kam bad ka bor jong u Sardar Vallabhbhai Patel.
Ha ka jingai jingkren ha ka 72nd National Film Awards, u lat u la ong ba ka kam shna phlim jong ka India ka la noh synniang bha sha ka jingpynkhlain ia ki jait kyntien bad ki dustur ba iar jong ka India.
U la kyntu ia ki nongshna phlim ba kin kyntiew ia ka rukom rep tynrai, ka rukom im kaba koit ba khiah bad ka jingpeit bniah ia ka mariang bad ruh ba kin kyntiew ia ka jingieid, ka jinglong shipara bad ka jingiatylli ha ka ri.
U Myntri Rangbah jong ka Gujarat Bhupendra PateI u la pdiang burom ia ka President bad kiwei kiwei ki kynrem ki lyndan kiba la wan sha Gujarat na ka bynta ka 72nd National Film Awards, bad u la ong ba ka jingpynlong ia kane ka prokram hangne ka long ka burom shisha ia ka jylla.
U la ban jur ia ka kam shna phlim kum ka jingpynpaw ia ka imlang sahlang, ka nongrah ia ka kolshor bad ka lad kaba khlain ban pyniasoh ia ki jingsngew jong u briew, ryngkat bad ka lad ban pynkhlain ia ka jinglong ka India ha ka pyrthei bad ka bor jong ka.
Da kaba ban jur ïa ka pateng ba riewspah jong ka Gujarat, ki jaka bapher bapher bad ki riti dustur, u la khot ïa ki nongshna phlim na India bad nabar ri ban jied ïa ka Gujarat ban ring phlim bad u la ai khublei ïa ka Tnad Information and Broadcasting kaba la wanrah ïa kane ka jingrakhe kaba donburom sha ka Jylla.
U Myntri Sorkar Pdeng ba dei peit ia ka Tnad Information & Broadcasting u Ashwini Vaishnaw u la pynpaw ka jingsngewnguh ia ka President ba don burom kaba la plie pyrda ia ka jingrakhe ia ka National Film Awards kaba 72 ha Ekta Nagar, Kevadia, bad ai khublei ruh ia baroh ki nongjop khusnam na ka bynta ki jingjop jong ki ha ka kam shna phlim jong ka India.
U Myntri u la ong ba ka kam shna phlim kadei ka jingiatreilang bad ba ka National Film Awards ka ithuh ia kiba ioh khusnam bad kiba trei ha lyndet. U la ai ka jingïaroh ruh ïa u Anant Nag uba la ïoh ïa ka khusnam Dadasaheb Phalke Award halor ka jingnoh synñiang ba radbah jong u ha ka kam shna phlim jong ka India.
U Ashwini Vaishnaw u la ong ba ka jingthmu jong ka National Film Awards ka long ban rah ïa kane ka jingrakhe sha ki jaka jngohkai kiba kongsan ha kylleng ki Jylla bad ki Union Territory, da kaba kyntiew ïa ka riti dustur ba riewspah jong ka India bad ka kam jngohkai pyrthei. U la kyntu ia ki jylla & ki union territory ban jied ia ki jaka jngohkai pyrthei kum ki jaka ban pynlong ia ki bynta ban wan jong ka National Film Awards.
Haba kren shaphang ka Indian Institute of Creative Technologies (IICT) kum ka tyllong ba thymmai jong ki briew kiba don sap, u la ong ba kumba 380 ngut ki samla pule ki la dep ban pynrung kyrteng ha ki 13 tylli ki jingpule, ha kaba ïa ka rukom ai jinghikai la saindur kaba la wanrah katkum ki jingdonkam.
U la pyntip shuh shuh ba u Myntri Rangbahduh ba donburom u la mynjur ïa ki 15,000 tylli ki Creative Lab ha kylleng ka ri, kaba plie ïa ki lad ki lynti kiba thymmai na ka bynta ki samla ban ïoh jinghikai ha kaba iadei bad ki teknoloji kiba dang mih bad ban pyni ïa ka kolshor ba iar jong ka India.
U Myntri u la kyntu ïa ki nongshna phlim bad ïa baroh kiba don bynta ha ka kam shna phlim, ryngkat bad u Prasoon Joshi kum u Chairman jong ka Prasar Bharati, ban ïarap ban ithuh, ban kyntiew ïa ki sap ba thymmai na ki shnong rit.
U la ban biang ba ki jingpyrshang lang jong ka Sorkar bad kito kiba don bynta ha ki kam saindur ka lah ban ïarap ban plie lad ïa ka bor saindur kaba khraw jong ka India bad plié lad ïa ki briew ba don sap jong ka India ban paw sha ki briew ha kylleng ka pyrthei.
U la kyrpad ruh ïa ki jingai jingmut bad ki jingmut na ka bynta ka WAVES 2027, ka ban long ha u bnai Risaw jong u snem ban wan.
U Secretary ka Tnad Information & Broadcasting u Chanchal Kumar u la ong ba ha ka National Film Awards kaba 72, la ioh pdiang haduh 400 tylli ki Feature Film ha ki 34 tylli ki jait ktien bad 161 tylli ki Non-Feature Film ha ki 24 tylli ki ktien, ha kaba 22 tylli ki Feature Film bad 23 tylli ki Non-Feature Film ki la iohpdiang ia ki khusnam. U la ong ba ka kam shna phlim jong ka India ka dang kiew kum ka lad kaba khlain bor ban pyni ia ka kolshor bad ka jingiathuhkhana ha ka pyrthei.
U Secretary u la ong ba ka jingpynlong ia ka National Film Awards shabar jong ka nongbah Delhi, ha Ekta Nagar, kadei ka sienjam kaba kongsan kaba la pynshong nongrim na ka jingiohi jngai bad ka jingshimkhia jong u Sardar Vallabhbhai Patel na ka bynta ka jingiatylli ka ri, bad ba ha ki snem ban wan, la thmu ruh ban pynlong ia kane ka jingpynkup burom ha kiwei pat ki nongbah.
Ka Jingrakhe ia ka Jingtbit: Ki Khana, ki Jingpyni bad ki bynta ba bun jong ka kam shna phlim jong ka India
Ia ka khusnam best actor in a Leading Role la ioh da u Mammootty na ka bynta ka Bramayugam bad u Kartik Aaryan na ka bynta ka Chandu Champion, katba ka Yami Gautam ka la ïoh ïa ka khusnam Best Actress in a Leading Role na ka bynta ka Article 370.
Ha kiwei kiwei ki thup, u Sanjay Mishra u la shah pynkup burom kum u Best Actor in a Supporting Role na ka bynta ka Bhakshak, katba ka Sachana Namidass na ka bynta ka Maharaja bad ka Ropashree Varkady na ka bynta ka Mithya ki la iasam lang ia ka khusnam kum Best Actress in a Supporting Role.
Ka Article 370 ka la shah jied kum ka Best Feature Film, katba u Randeep Hooda u la ioh jingithuh na ka bynta ka kam ba thymmai jong u kum u director jong ka Swatantrya Veer Savarkar. Ka Kalki 2898 AD ka la ioh ia ka khusnam Best Popular Film Providing Wholesome Entertainment, katba ka Captain Miller ka la ioh ia ka khusnam Best Feature Film Promoting National, Social and Environmental Values. U Rajkumar Periasamy u la ioh ia ka khusnam Best Direction award na ka bynta ka Amaran.
Kane ka prokram ka la pyni ruh ia ka jingiar jong ki jait ktien ha ka kam shna phlim jong ka India. Ha ryngkat ki jait kyntien kiba don ha ka khyrnit kaba Phra jong ka Riti Synshar jong ka ri India, ki kam shna phlim Garhwali bad Tulu ruh ki la ioh ia ka jingithuh.
Ka Dholi, ba la pynmih da ka SC Pharmachem Pvt. Ltd. bad direct da u Dinesh P. Bhonsle, ka la ioh ia ka khusnam Best Garhwali Film award, katba ka IMBU, ba la pynmih da ka Pichchar Studio bad direct da u Shivadhwaj Shetty, ka la ioh ia ka khusnam Best Tulu Film.
Ka Angen, ka phlim Santhali ba direct da u Ravi Raj Murmu, ka la ioh ia ka khusnam Best Debut Film of a Director award.
Naduh ka Garhwali bad Tulu haduh ka Santhali, ha kane ka sngi ki la don ki sur bapher bapher ha kawei ka rynsan jong ka ri kaba pyni ba baroh ki jait kyntien ki don la ka bynta ha ka kam shna phlim jong ka India.
ka 72nd National Film Awards ka la wanrah lang ia ki briew kiba la pawnam, ki sur ba doing mih, ki kam shna phlim bad ki kam iathuh khana jong ki thain ha kawei ka rynsan jopng ka ri. Ha Ekta Nagar, kane ka janmiet ka la long ka jingrakhe ia ka kam shna phlim jong ka India kaba don jingiadei bad ki jait kyntien bapher bapher, ki dustur bapher bapher bad ka jingiasoh lang jong baroh lyngba ka kam shna phlim.
Na ka bynta ka thup jong kiba jop ia ki khusnam bad na ka bynta ki jingtip ba kham bniah, phi lah ban shong hangne: Complete List of Awardees
