Shillong, Risaw 16: Ka kong Dreamlet Mary Warjri President Seng Longkmie Pyllun shnong Madan Sohmylleng bad u bah Arius Basaiawmoit President Meghalaya Youth Federation kila pynsngew ba ki kwah ban ioh ia ka jingpynshai ha kaba iadei bad ka shnong Sohmylleng ka shnong Lawkanoh kaba kila dep wad jingtip lyngba ka Right to Information Act.
Ka kong Dreamlet haba kren ha ki lat pathai khubor ha Shillong Press Club kala iathuh ba kila pan ia ka RTI na ka ophis jong u syiem ka Hima Nongkhlaw ha kaba iadei bad ki kot ki sla bad ka shnong Sohmylleng hynrei kim shym la ioh satia bad ia kane kila ujor ruh sha u Apellete Authority ka KHADC.
Hynrei haduh mynta la katto katne bnai kim shym la ioh ia ka jingpynshai kaba tikna wat na ka District Council ruh, kala ong ba kim don kano kano ka jingpyrshah iano iano ruh hynrei ki shu kwah ia ka jingpynshisha hato ka shnong Sohmylleng ka hap hapoh jong kano ka hima.
Ka kong Dreamlet kala ong ba na ka liang jong ka hima Nongkhlaw kam shym la ai ia ka jubab kaba shai haba iadei bad kane ka kam shnong hynrei kala ong kumba ka paw na ki kot ki sla katkum ka AD Roll jong ka KHADC ka shnong Sohmylleng ka hap hapoh ka hima Sohiong Lyngdohship.
U bah Arius Basaiawmoit u la ong ba ki kwah ban ioh ia ka jingpynshai la ka shnong Lawkanoh ka don ne em ia u sordar shnong ki nongkitkam shnong hapoh katei ka shnong kumba kila ioh ia ka jingbatai hynrei kaei kaba ki ki tip ba katei ka jaka Lawkanoh kam shym don kata ka shnong.
