Shillong, Risaw 16: u bah Jewel Son Roy Lyngdoh u President jong ka Meghalaya College Non-Teaching Employee Association u la ong ba ka seng ka dawa na ka sorkar ba kan siew noh ia ka Dearness Allowance kaba 53% bad ban pyntreikam ia ka Modified Assured Career Progression Scheme.
Haba kren ha ki lat pathai khubor ha Shillong Press Club u bah Jewel u la ong ba kum ki nongtrei ha ki kollej ba dei ki Deficit ha kylleng ka jylla kim kwah ban ia mih madan kila iai bud dien ia kane ka Dearness Allowance mynta la ar snem lynter hynrei kaei kaba ki ioh jingtip ba ka sah teng bad ka tnad pla pisa ka sorkar jylla.
Kum ki nongtrei kila iai shah namar ki sngewthuh ba ka kam ophis ka shim por hynrei mynta kala dei ba kin ioh haduh lai sien ia ka Dearness Allowance naduh ka por ba ka dang dei 49% bud sa ka 51% bad mynta kala dei sa ka 53% hynrei mynta ki sah ha ka umdum dei na kane ka daw ba kim banse shuh ban pyntip lem sha ka sorkar lyngba ki lat pathai khubor.
U bah Jewel u la ong ba na ka jingiohi ka jong ki u myntri rangbah ka jylla u long uba kloi ban iarap kumta ki kyrpad ia u ban iarap lem ban bud dien lem na kaei ka daw ba ka sah kut ka DA ka jong ki bad ban pyntreikam noh ia ka Modified Assured Career Progression Scheme na ka bynta ki bym dei ki nonghikai hynrei kiba trei ha ki kollej bapher bapher ha ka jylla.
Na ka liang ka seng ka dawa na ka sorkar ba ka dei ban leh eiei ban pyllait noh ia ka DA ha shuwa ka 1/Naiwieng/2026 lada ka sorkar kam leh eiei ki ruh kin hap ban pyrkhat da kum wei pat namar ka jingkiew dor ki marbam mardih ha iew ha hat kala ktah ia ka iing ka sem.
