Shillong, Risaw 16: Ka “Jaiñtia Students’ Union”, Jowai Circle, ka pynkup burom ïa u Mayalang Pakem halor ka jingjop ba khraw jong u ha ka kam shad met.
Ka “Jaiñtia Students’ Union (JSU), Jowai Circle, ha kane ka sngi ka la pynpaw ïa ka jingsngewkmen bad jingsngew sarong ban ai khublei bad pynkup burom ïa u Mayalang Pakem, uba la 24 snem ka rta, uba dei na ka shnong Mynthong, Jowai, halor ki jingjop ba kyrpang jong u ha ka kam ïalehkai shad met (Bodybuilding), kaba la wanrah ïa ka nam bad ka burom ïa ka thaiñ Jaiñtia Hills bad ïa ka jylla Meghalaya hi baroh kawei.
U Mayalang Pakem u la khur ïa ka takma ksiar ha ka Senior Men’s 55 kg Category ha ka lympung ïakop shad met jong ka _2nd Mr. & Miss Asia Bodybuilding Championship 2026_, kaba la long ha Sri Aurobindo Institute, Shillong, ha ka 10 tarik u Risaw, 2026. Kane ka jingjop ka long ka sakhi kaba shai ïa ka jingtrei shitom, ka jingaiti lut, ka jingminot bad ka jingkut jingmut jong u ha kane ka kam ïalehkai.
Ym tang katta, ha kaba sdang jong une u snem, u Mayalang u la khur ruh lai tylli ki takma ksiar ha ki lympung ïakop shad met kiba heh kiba la long ha Guwahati, Assam. U la ïoh ruh ïa ka _Natural Pro Athlete Card_, kaba long kawei pat ka jingjop kaba khraw ha ka jingïaid lynti jong u ha ka kam shad met.
Kum ka dak jong ka jingithuh bad jingai burom ïa kine ki jingjop jong u, ka JSU, Jowai Circle, ka la pdiang burom ïa u Mayalang Pakem ha ophis jong ka Union ha Jowai. Ka Union ka sngew sarong ïa ka jinglah jong u ban kyntiew ïa ka nam jong ka thaiñ Jaiñtia Hills ha ki lympung ïakop kiba heh bad ban pynpaw ïa ka sap jong ki samla na Meghalaya.
Ka Union ka ai jingïaroh ruh ïa ka jingtrei shitom jong u bad ïa ka jingïalam bad jinghikai jong u coach jong u, Dr. B. Desire Kynjiñ, na Satar Gym, Ummulong, uba la don bynta ban ïarap ïa u ha ka jingïaid lynti jong u sha ka jingjop. Ka jingïaid lynti jong u Mayalang ka long ka nuksa kaba bha ïa ki samla, khamtam eh ïa kito kiba don ka jingangnud ban long ki nongïalehkai kiba paw ha ka jylla bad ha ka ri.
Ha kajuh ka por, ka JSU, Jowai Circle, ka pynpaw ïa ka jingkyrmen ba kine ki jingjop kin long ka jingpynshlur ïa ka Sorkar, ki seng bapher bapher bad ki nongai jingïarap (sponsors) ban ai ka jingkyrshan kaba kham khraw ïa ki nongïalehkai kiba don sap na Meghalaya. Ka jingduna ha ka jingïarap pisa kam dei ban long ka jingkhanglad ïa ki nongïalehkai kiba don sap ban ïoh ïa ka lad ban mihkhmat ïa ka jylla bad ïa ka ri ha ki lympung ïakop kiba kham heh ha ka pyrthei.
Na ka liang ka JSU, Jowai Circle, ka ai khublei kyrpang ruh ïa ka The Daily Dose” halor ka jingnoh synñiang bad jingkyrshan jong ka lyngba ka jingpynbiang ïa ki merchandise kum ka sponsorship ïa u Mayalang Pakem.
Kane ka jingkyrshan ka long kaba kordor bad ka pyni ïa ka jingdon bynta jong ki kam shimet bad ki nongkhaïi ha ka ban kyntiew ïa ki sap bad ki nongïalehkai na ka thaiñ.
Ha kaba kut, ka JSU, Jowai Circle, ka kitbok kitwiang ïa u Mayalang Pakem ba un dang ïoh shuh shuh ïa ki jingjop kiba kham khraw ha ki lympung ïakop kiba wan, bad ba un nang kyntiew ïa ka nam bad ka burom jong ka thaiñ Jaiñtia Hills bad ka jylla Meghalaya baroh kawei lyngba ka kam ïalehkai shad met.
