Shillong, Risaw, 16: Ka tnad kolshor bad riti dustur, sorkar Meghalaya kala pynlong iaka jingiakop rwai iaki jingrwai tynrai jong ka State-Level Inter-School kaba hap hapoh ka Reform Utsav – Jan Jatiya Gaurav Divas 2026 ha State Central Library, Shillong, kaba long ruh kawei na ki jingiakop na ki skul bad ki kolej bapher bapher ha kylleng kane ka jylla.
Ha katei ka prokram, la don u Myntri ka kolshor bad riti dustur, u bah Sanbor Shullai, kum u kongsan, katba u bah Frederick Roy Kharkongor, IAS, Principal Secretary, kila don lang ha katei ka prokram kum ki nongshah khot sngewbha.
Ki skul bad kiwei kiwei ki skul bah kiba la iashim bynta, kila ioh jingiaroh na ka bynta ka jingshad jong ki, kaba la pyni iaki jingrwai tynrai, jingput jingtem bad kiwei kiwei ki jingrwai kiba la kynud sur na ki jingrwai hyndai jong ka jylla.
Ka jingiashim bynta ha ki jingshad da ki khynnah skul bad ki samla pule ha ki kolej ka pyni iaka jingriewspah bad ki sur jingrwai tynrai jong ka jylla Meghalaya bad ka pynpaw ruh iaka jingdonkam ban pynneh bad pynsah bad pynkhlain iaka tynrai kaba long hapdeng ka pateng ban wan ki samla.
Katei ka jingiakop rwai ka pynioh iaka rynsan na ka bynta jong ki khynnah pule ba kin pyni ia la ki sap ki phong jong ki katba ka jingpynshlur ban sngewthuh bad kyntiew iaka riti dustur kaba riewspah jong ka jylla bad ban pynneh pynsah bad aiti iaki kolshor bad ki jingrwai tynrai sha ki pateng ki ban wan.
