Shillong, Risaw, 23: Ka West Khasi Hills District kala rakhe iaka jingdap 50 snem jong ka da kaba pyni phuh iphieng ha kaban shor kotkudi bad ka jingiakop shong kulai kaba itynnad ha Mynni Mawbri.
Kum shi bynta jong katei ka jingrakhe jingdap 50 snem jong ka West Khasi Hills District, ka bor ba dei peit jong kane ka District, ha ka jingiatreilang bad ka tnad jngoh kai pyrthei, ka Haikai Travels, bad ka Mynni Mawbri Multipurpose Primary Agricultural Credit Cooperative Society Ltd., kila pynlong ia kane ka jingiakop pyn her kotkudi bad shong kulai ha lympung jong ka Mynni Mawbri mynta ka sngi.
Ka lympung kala pyniasoh lang iaki paidbah bad ki nongshong shnong lem bad ki nongshong kulai tynrai, da kaba pynshongkun, pynshongshit bad ka kolshor ha ka lehniam lehrong pyndonburom iaka jingdap 50 snem ka distrik. Kine ki jingiakop kila pynpaw iaki rukom bad dustur tynrai ba riewspah jong kane ka jaka bad ki kam jngoh kai, ryngkat kaba pynshlur iaka jingiasnohkti lang jong ki paidbah ha ki lehniam lehrong jong ka Jubili Ksiar.
Ha katei ka prokram, la sakhi lang da u Superintendent ki pulit ka West Khasi Hills District, u bah H. Kharkongor; u bah R. Kharkongor, Block Development Officer (BDO), Mawshynrut; u bah Marc A. N. Diengdoh, Tourist Officer, Nongstoin; u rangbah shnong ka Mynni Mawbri bad katto katne ki dkhot jong kane ka shnong.
Katba ki nongjop jong ka jingiakop niah kulai ki long ha ka kyrdan ba nyngkong dei u Kynsaiborlang Wahlang. Ha ka kyrdan ba ar jong ka bynta ka Thup Rit, dei u Wosligen Wahlang. Ba lai ha ka bynta jong u Nika dei u Eric Kharbani.
Iaki nongjop jong ka jingiakop pyni kulai la wan ba nyngkong kata ka bynta jong u Kulai Saw dei u Sabut Wahlang. Ba ar jong bynta jong u Lai Lieh, dei u Pleindar Sangriang. Ha ka kyrdan ba lai, Koh Mut dei u Beindinglan L. Marshillong.
Iaki nongjop jong ka jingiakop pyn her kotkudi, ha ka kyrdan Highest-Flying Kite, la wan da u Zachary Khongtim. Katba uba dei Most Creative Kite, dei u Jubilathmu Mawlieh bad ha ka thup jong ka Biggest Kite That Flew dei u Khraw Mawlieh.
Katba ki nongioh bynta ha ki Consolation Prize, la sam sha kine ki nongiashim bynta kiba la pyni sap bad ka jingtrei shitom jong ki ba kynthup iaka jingpyn her iaki kotkudi shaduh shalor sahit bneng lane kiba poi sha jngai khlem don jingtar ki long u John F. Khyriem, Pynshaibor Marwein, Kailas Lyngdoh Nonglait, Longkmen Jat bad u John Marwein.
Kine ki jingiakob kila long ka dak kaba kynmaw kyrpang jong ka jingkhawai sngewnguh Golden Jubilee, kaba la pynlong lang iaka dustur, ka mynsiem ialehkai bad ka jingiatreilang ka imlang ka sahlang. Kane ka jingsdang kaba kyrpang kala pynshisha ruh iaka jingdonkam jong ka jingiada bad ka jingpynpaw iaka mawlynti bad ka tynrai kaba la don lypa ha u pud u sam jong ka district, katba ki dang pynkynmaw iaki shiphew snem ka jingseng bad ka roi ka par.
