Shillong, Risaw 28: Ha kane ka sngi kynmaw burom ïa ka lyngkhuh sngi khlad kaba hynriew jong ka Mei-ieid Spility Lyngdoh Langrin, ka Khasi Students’ Union (KSU) ka pynpaw ïa ka jingsngew burom kaba khraw ïa ka jinglong shlur, ka jingkut jingmut bad ka jingïeng skhem jong ka ban ïada ïa ka khyndew ka shyiap, ka koit ka khiah bad ka jingim jong ka Jaitbynriew Hynñiewtrep.
Ka Mei-ieid Spility Lyngdoh Langrin i long ka nuksa kaba khraw jong ka jingieid ïa ka Ri bad ka jaitbynriew. Ka jingkyntait jong i ïa ka song tyngka kaba ₹45 klur ka pyni shai ïa ka nongrim jong ka ban buh hakhmat eh ïa ka jingmyntoi bad ka jingbit jingbiang jong ka Jaitbynriew, ban ïa ka jingmyntoi shimet. Ka jingaiti bad ka jinglen lade jong i kan ïai sah kum ka jingai mynsiem bad ka nongmuna ïa ki pateng ban wan.
Ka KSU ka pynkynmaw ruh ba dei i Mei-ieid Spility Lyngdoh Langrin ryngkat bad ka Seng kiba la sdang ban pyrshah tyngeh ïa ka jingpyrshang jong ka Sorkar India ban tih Uranium ha ka khyndew jong ka, kaba hap hapoh ka Hima Langrin. Kane ka jingïakhun ka la long ka dak jong ka jingïeng skhem ban ïada ïa ka khyndew ka shyiap bad ban pyrshah ïa kino kino ki kam kiba lah ban buh ha ka jingma ïa ka koit ka khiah, ka jingim bad ka lawei jong ki trai-ri trai muluk.
Kum ka dak jong ka jingkynmaw bad ka jingburom ïa kane ka jingïakhun ba khlem pyndem jong i Mei-ieid Spility ïa ka lyngkhuh sngi khlad jong i, ka KSU ka rakhe ïa kane ka sngi kum ka “Anti-Uranium Day”, ban pynïai pynkynmaw ïa ka jingïakhun pyrshah ïa ka jingthmu khlong Uranium bad ban pynskhem ïa ka nongrim ban ïada ïa ka khyndew ka shyiap bad ïa ka hok jong ki khun u Hynñiewtrep.
Ka Khasi Students’ Union ka pynpaw biang ïa ka nongrim kaba skhem ban pyrshah ïa ka kam tih Uranium bad baroh ki kam wad bniah shuwa ban tih ha Domiasiat, Mawthabah, Wahkaji bad ki thaiñ ba marjan. Ka Seng ka ngeit skhem ba ki kam pynroi kam dei ban wanrah ïa ka jingma ïa ka koit ka khiah jong ki briew, ka mei mariang, ka khyndew ka shyiap bad ka jingim jong ki pateng ban wan.
Ka KSU kan ïai ïeng skhem ban ïada ïa ka hok longtrai jong ki trai-ri halor ka khyndew ka shyiap, katkum ki kyndon jong ka Riti Synshar ka Ri, ki hok longtrai jong ka jaitbynriew ïa ka khyndew ka shyiap khamtam kumba la ithuh hapoh ka Sixth Schedule.
Kum ka seng, ngi sngewdei ban ban jur ba, “Ngi dang donkam shibun ki briew kum i Mei-ieid Spility Lyngdoh Langrin, kiba shlur, kiba kut jingmut bad kiba ïeng skhem ban ïada ïa ka khyndew ka shyiap bad ïa ka pateng ban wan jong ka Jaitbynriew Hynñiewtrep khlem da iapeiñ noh tang namar ba la ïoh tyngka”.
Ka KSU ka ngeit ba ka jingkynmaw burom ïa i Mei-ieid Spility Lyngdoh Langrin kam dei tang ka jingleh burom ba shisien shisnem, hynrei ka dei ka juban lak ba ngi shim ban bteng ïa ka nongrim bad ka jingïakhun jong i. Ka jingaiti jong i kan ïai long ka nongmuna bad ka jingai mynsiem ïa baroh kiba don ka jingkitkhlieh ban ïada ïa ka ri ka jaitbynriew bad ïa ka mei mariang.
Ka Seng ka kwah ruh ban pynpaw shai ba ki resolution kiba la mynjur da ka Ïing Dorbar Thaw Aiñ jong ka Jylla bad ka District Council kim dei ban shu sah tang ha ki sla kot, hynrei ki dei ban pyntreikam bad buddien da kaba tyngeh, ban pynthikna ba ym ailad satia ïa ka kam tih Uranium ha kine ki thaiñ. Ka KSU kan ïai ïeng skhem ban ïada ïa ka khyndew ka shyiap, ka hok jong ki trai-ri bad ka lawei jong ka Jaitbynriew Hynñiewtrep.
