Shillong, Risaw 29: Ka tamasa Shillong Cherry Blossom kala wanphai biang ha ka 20 bad 21/Naiwieng/2026 ryngkat bad ka line up ba phylla jong ka pyrthei bad ka jingrakhe iaka jingrwai ha ki pateng bynriew. Katba ki nongrwai ba na ri phareng kiban pynshongshit ha katei ka tamasa ki kynthup ia u Mr. Nelly bad u Khalid.
Ha katei ka tamasa, ka kynhun jong ka kompany ba pynmih iaki tamasa, ka Rockski EMG kala ai khublei iaka jingiohi jngai jong ka sorkar Meghalaya bad ka jingkyrshan kaba iai neh ha kaban tei ia kaei kaba ki nongpyniaid ki ong ba ka dei ka tamasa ba wan ha ka kyrdan ba nyngkong jong ka Ri India bad kawei na ki kompany jngoh kai pyrthei ba pawnam jong ka jylla Meghalaya.
Kane ka jingkhie im bad ka jingsan jong ka tamasa ka pyni iaka nam bad ka jingjop ba khraw iaka jylla. Da kaba tip bad ithuh iaka bor jong ka rwai ka siaw bad ka riti dustur ban ring iaki nong jngohkai pyrthei, ka sorkar Meghalaya kala iarap ban pynlong ia kane ka rynsan kaba khring iaki nongrwai bad ki nongialehkai na kylleng ka pyrthei sha Shillong, ban pynleit iaki nongwankai na kylleng ka ri India bad ban pynshong tynrai iaka Meghalaya hapdeng ki jingiakren halor ki tamasa pyrthei.
Kane ka jingkular ka ai iaka jylla Meghalaya iaka jingithuh bad nyngkong kum ka jaka ba bun ki nongrwai na kylleng ka pyrthei ki iashem bad ka kolshor jong ka Meghalaya bad ka jingburom iaki nongleit nongwan bad ka jingpdiang sngewbha. Ka jingithuh iaka Cherry Blossom lem bad ka khusnam Music Festival of the year ha ka EEMAX Global ha u snem 2025 ka pyni iaka jingsakar jong ka rynsan kaba donkam bha ha kata ka jingiaid lynti.
Ka jingiarap ka sorkar kam long tang na ka bynta kawei ka rynsan kaba shisien shi snem. Hynrei kala iarap ban shna ia kawei ka rukom jngohkai pyrthei kaba iai neh sah bad kaba plie lad iaki nongshna phlim, ki kam basa, ki kam khaii pateng, ki nongseng kam lajong bad ki samla. Na ka bynta ka Meghalaya, ka Cherry Blossom ka long ka jingkmen iaka rukom rwai rukom siaw bad ka dei ruh ka rynsan ban ioh iaki lad ioh kam ioh jam ba kham iar.
