Ampati, Risaw 29: La plie iaka jaka jingai jinghikai shaphang ka Basic Computer bad Data Entry Operator ha Chapahati-I kaba hap hapoh ka Chief Minister’s Skill Mission na ka bynta ban pyntbit iaki samla na kiba na ki shnong nongkyndong da ki jinghikai halor ka digital bad pynbiang ba kin ioh kam ioh jam hadien ha bud.
Ia katei ka jaka ai jinghikai, la pynlong da ka VLE Society lem bad ka jingkyrshan na ka Meghalaya State Skill Development Society (MSSDS). La don lang ha katei ka prokram da ki nongai jinghikai, ki kmie ki kpa, ki dkhot jong ka VEC, ki nongpyniaid shnong bad kiwei kiwei ki riewpawkhmat.
Katba ka ophisar jong ka MSSDS Skill Development, Ampati, ka Tesilchi Ch. Sangma kala kren shaphang ka jingdonkam jong ka jingtip shaphang ka kompiwtar ha kum kane ka iew treikam ha kine ki sngi bad kala pynshlur iaki samla khamtam iaki kynthei ba kin pyndonkam iaki kabu ban pynroi iaki sap ki phong.
Ka ophisar jong ka Zikzak Block Development, ka Torali K Marak kala ai jingiaroh ia kane ka jingpyn long iaka prokram ai jinghikai namar ba ka wanrah iaka jinghikai sha ki jaka ba jngai bad kular ban kyrshan na ki bor pyniaid jong ka Block.
U Additional Deputy Commissioner, u D B G Momin, MCS, u la ban jur halor ka jingdonkam jong ka pule puthi kaba pynshong nongrim ha ka jingtbit na ka bynta ki samla ba kin ieng hi ha la ki jong ki kjat bad kyrpad iaki nongshah ai jinghikai ba kin nym pep ha kane ka jingai jinghikai bad bud ryntih iaki kyndon.
U kongsan ba dei u MDC jong ka Nogorpara, u Linekar K Sangma u la plie pyrda ia katei ka jaka ai jinghikai da kaba ong ba ki jingai jinghikai shaphang ka digital ka long kaba donkam na ka bynta ban pyntbit ialade ha ka jingioh kam ioh jam bad ban pynduna ka jingleit na kawei ka jaka sha kawei pat hapdeng ki samla na ki shnong nongkyndong.
La sdang ia katei ka prokram da ka jingdwai da u Pamong jong ka Chapahati Local Baptist Church bad la pynkut da ka jingai khublei da u VEC Secretary jong ka Chapahati.
Ia kane ka jaka ai jinghikai, la pynkloi mynta ban sdang ban ai jinghikai kaba ryngkat ne kaba beit iaka thup ki samla kiba pyn ryngkat kyrteng, da kaba wallam iaka jingstad kompiwtar bad ki jingshisha kiba iadei bad ki kam pynioh kam ia kiba shong ha shnong ha kane ka thain.
