Shillong, Risaw 30: Ka ophis trekkam jong ka MYBharat Jowai, West Jaintia Hills district, ka la pynlong ïa ka prokram kaba la tip kum ka Block-Level Neighbourhood Youth Parliament bad Viksit Bharat Yuva Samvaad ha ka skul Mookyndur Secondary School, Thadlaskein Block.
La pynlong ia kane da ka jingthmu ban kyntiew ia ka jingtip jong ki khynnah samla shaphang ka hok bad ka kamram jong ki kum ki nongshong shnong, ka jingïashim bynta ha ka kam synshar paidbah, ka jingkitkhlieh ha ka imlang sahlang bad ka bynta jong ki samla ha kaban tei ïa ka ri.
Ïa ka prokram la pynïaid da u Bah Eborlang Pohlong, uba long ruh U MYBharat Youth Volunteer. Ka kong D. Laloo, Principal jong ka skul Mookyndur Secondary School, kaba la ai ïa ka jingkren pdiang bad pdiang sngewbha ruh ïa ki riewkongsan, ki riew shemphang, ki khynnah skul bad baroh kiba la wan ban ïashimbynta.
Haba kren ha ka jingïalang, na ka liang U ST Haokip, uba dei u District Youth Officer, MYBharat Jowai, u la pynshai halor ka jingdonkam jong kane ka prokram ha kaban pynkupbor ïa ki khynnah samla bad ban pynskhem ïa ki nongrim jong ka rukom synshar paidbah.
U la ban jur ïa ka bynta kaba kongsan jong ki samla ha kaban pynurlong ïa ka jingthmu jong ka Viksit Bharat, bad u la kyntu ruh ïa ki ba kin long ki nongshong shnong kiba don ïa ki jingtip kiba tikna, kiba don ka jingkitkhlieh bad kiba ïashimbynta shitrhem, da kaba tip ruh ïa ki hok bad ki kamram jong ki hapoh ka imlang sahlang bad ka ri hi baroh kawei.
Ha kane ka sngi la pynlong ruh ïa ka jingïalang pynsngewthuh paidbah halor ka jingma jong ka jingdih ïa u drok bad ka jingpyndonkam bakla ïa ki kynja jingdih kiba pynsniew ïa ka met (Drug and Substance Abuse) ha kaba ïa ka jingïalang la pynïaid da ka Kong F. Suting, kaba la pynshai ruh halor ki jingktah basniew jong ka jingpyndonkam bakla ïa ki jait jingdih da ki riew shimet, ki longïing longsem bad ka imlang sahlang.
Shuh shuh ka Kong Suting ka la kyntu ruh ïa ki nongïashim bynta ba kin im ïa ka jingim kaba koit ba khiah bad ban shim ïa ki rai kiba dei. La pynkut ïa ka jingïalang lyngba ka jingpynbam smai ban ïatreilang bad pynduh shisyndon ïa ka jingdih drok (Nasha Mukt Pledge), ha kaba ki nongïashim bynta ki la pynskhem ïa ka jingkular jong ki ban pynlong ïa ka imlang sahlang kaba lait na u drok.
Kawei na ki bynta ba kongsan tam jong kane ka prokram ka long halor ka jingpynsngewthuh paidbah shaphang ka Special Intensive Revision (SIR) jong ka thup kyrteng (Electoral Rolls) ha kaba la ai jingkren da u Player Suna, uba long u nonghikai ha ka kam ïalehkai phutbol (Football Coach) bad ruh U Youth Icon.
Ha kane ka jingïalang la kham pynleit jingmut halor ka jingdonkam ban pynneh ïa ka thup kyrteng jong ki nongthep vote kaba dei, kaba thymmai bad kaba kynthup lang ïa baroh ryngkat ka jingpynkhlaiñ ïa ka rukom treikam kaba shai bad ka jingïashimbynta ha ka kam synshar paidbah.
Ha kane ka sngi la pynsngewthuh ruh ïa ki nongïashimbynta shaphang ka rukom pynrung kyrteng ban ïoh thep vote, ka jingpynthikna ïa ki jingtip ba shimet jong ki hapoh ka thup kyrteng jong ki nongthep vote bad ka jingdonkam ban pynthikna ba baroh ki nongshong shnong ki long kiba la biang ki kyndon ban don hapoh ka thup kyrteng jong ki nongthep vote.
Ha ka jingïakren, la kdew ruh ïa ka jingkitkhlieh jong ki khynnah samla halor kumno ban pynsngewthuh ïa ki bahaïing hasem bad ki briew ha ki shnong ki thaw jong ki halor ka jingdonkam jong ka jingïashimbynta ha kaban pyntreikam ïa ka hok ha ka por ilekshon.
La kyntu ruh ïa ki nongïashim bynta ba kin tip ïa ki hok jong ki kum ki nongthep vote, ban long kiba ïoh ïa ki jingtip kiba biang bad ban noh synñiang sha ka rukom synshar paidbah kaba kynthup lang ïa baroh, khnang ban ym don uwei ruh u nongshong shnong u ban duh ïa ka hok ban thep vote ne u ban shah ieh shadien.
Na ka liang U Player Suna haba ïasam ïa ki jingshem bad jingïaid lynti jong u ha ka kam, U la ai mynsiem ïa ki khynnah skul ba kin bud bad beh sha pyrshah ki jingthrang jong ki da ka mynsiem jong ka jingaiti lut, ka jinglong ryntih, ka jingiaishah bad ka jingkut jingmut.
U la pynpaw ruh ïa ka jingdonkam jong ka jingïalehkai, ka jingmut kaba bha bad ka jingtrei shitom ha kaban pynbha ïa ka jinglong briew bad ban pynlong ïa ka lawei kaba seisoh.
Ban pynkhlaiñ shuh shuh ïa ka jingsngewthuh halor ka kam synshar paidbah, ka Kong Kyrkhumi Papeng, kaba dei ka MYBharat Volunteer, ka la pynlong ïa ka jingpynbam smai bad kular ïa kaba la tip kum ka Loktantrik Pledge, da kaba kyntu ïa ki nongïashimbynta ba kin bat skhem ïa ki nongrim jong ka jingsynshar paidbah, ban burom ïa ki nongrim jong ka Riti Synshar ka Ri India bad ban pyndep ïa ki kamram jong ki kum ki nongshong shnong kiba don ka jingkitkhlieh.
Lyngba kane ka sienjam, ka ophis treikam jong ka MYBharat Jowai ka la pynskhem ïa ka jingaiti jong ka ban pynheh pynsan ïa ki samla lyngba ki jingtip kiba bha, kiba don ka jingkitkhlieh bad kiba la shah pynkupbor.
Da kaba pynïasoh lang ïa ka jingtip halor ka ilekshon, ka jingsngewthuh shaphang ka kam synshar paidbah, ka jingpyrshah ïa ka jingdih drok bad ki jingïalang ban ai mynsiem, kane ka prokram ka la ai lad ïa ki samla ba kin sngewthuh ïa ka bynta jong ki ha ka imlang sahlang bad ban noh synñiang ha kaban tei ïa ka ri bad ruh ban pynurlong ïa ka jingthmu jong ka Viksit Bharat ha u snem 2047.
