Nongpoh, jymmang 09:Ka RBYF ka pynpaw ba ka ILP ka dang iai im hapoh ka Bri- Hynniew Trep bad kum ka seng kaba don hapoh ka shatri jong ki 13 seng kiba ia khih ban dawa ban pyntrei kam ia ka ILP kam shym la kylla ne randien na ka jingdawa hynrei kaei kaba la pynlong ia ka seng ban phai khmat sa ka jingai jingmut kaba thymmai ka long ba hadien ba ka seng kala pdiang ba yn ym lah ban pyntrei kam Ia kane ka ain kumba ka long hapoh jylla namar lada phai ha ka sla ba ar bad halor ka section 2 Bengal Eastern Frontier Regulation 1873 Reg.V la thoh shai ba ia ka Garo Hill la weng noh na ka thup jong ka ain (Repeal) Katkum ka Repeal Act 1897.
Ka RBYF bad baroh ki nongialam jong ki 12 seng ki la ioh pdiang ia bun tylli ki Ain kiba la don lypa ha ka Sorkar jylla ban iada ne theh iaka jingwanrung kyrthep jong ki mynder bad hadien ba la pule bniah ba ki don ki Rules hapoh kitei ki ain baroh kiba long kiba biang bad bun ki long kiba synjor kaba la pynlong ia ngi baroh ban pynkhreh iaka jing ai jingmut kaba thymmai bad kaba kham bha shuh shuh ban iaka ILP (BEFR 1873). Ngi ngeit baka Original ILP kumba la kynthoh da katto katne ha ki kot khubor ka long shisha kaba biang hynrei ban dawa ha ka Jylla hi donkam ban Amend biang ia katei ka Ain hynrei shisien ba la Repeal ia kino kino ki Act ngi tip ba yn ym lah ban pynrung biang ia kajuh.
Nalor kitei ki jingai jingmut kiba la pynlut por bad trei shitom naka liang jongki nongialam seng khamtam ka FKJGP,KSU bad ka HNYF bad lada ki katto katne ki paidbah ki dang iai ong ba kam long kaba biang te ka RBYF ka ai jing kyrshan ia ka HSPDP bad ia ka GNC halor ka jing dawa ban phiah noh (Bifurcate) iaka jylla sha ki artylli ki jylla ka Khasi- Jaintia bad ka Garoland. Bad shisien la lah ban ioh iaka jylla ka seng kan ieng ban dawa ban pyntrei kam mardor ia ka ILP (BEFR 1873).
Hynrei kane ka issue ka la long ruh kawei na ka shibynta naki mat ha ki Election kiba la dep. Tang kawei ka jing kyrpad kaba ka seng ka pashat lyngba kane ka long ha ki seng riewlum kiba la ioh synshar ha ka KHADC kiba juh kren naka por sha ka por kum ka KHNAM, HSPDP ia ka ILP ba kin phai bad peit ia ka ain UKJH (Application of Law) Regulation 1952 kila don ne em ka jing aibor ban kren bad pyntreikam iaka Bengal Eastern Frontier Regulation,1873 hapoh u pud u sam jongka Autonomous. Lada don kin ym dei shuh ban kren tang ha ki lad pathai khubor halor ka ILP hynrei ban thaw ki lad ban pyntrei kam iaka lyngba ka District Council.
Ka Ri Bhoi Youth Federation ka khmih lynti ba ka Sorkar kan leh iaka jingdonkam ban pyntreikam iaki jingai jingmut daki 13 seng baroh khnang ba ka roi ka par bad ka ioh ka kot jongka Jylla kan ym ktah tang naki daw jong ka jingiapyni bor. Ngi khmih lynti ba u Dr.Mukul Sangma un shim ialade kum u Chief Minister jong ka Jylla ym kum u Chief Minister jong ka Congress.(SP News)
