Shillong, Naitung, 28: Myn hynnin ka sngi por shiteng synnia kumba 1:30 ei ei mynstep, uwei u rangbah briew ba la tip kyrteng kum David Khongsit (Nongsawlia) uba trei ha Star Cement kum u Asst. Engineer (Electrical) u la buaid kiad , u la rung jubor shapoh ka kamra jong ka kong K. Pdang ba don don khun iwei bad sahwai ha iing U Drake Nongtdu ha Lumshnong bad u la ktah ia ka jinglong kynthei jong ka bad pyrshang ruh ban batbor ia ka. Hadien ba ka la lynniar bad pyrta briew bad iohlad ban mih shabar, la wan kiba sah marjan bad u lok jong ka bad u la phet noh.
Katei ka jia ha ka por ba katei ka longkmie ka dang iohthiah bad I khun ba dang 8 bnai.
Hadien ba ka la dep thoh ia ka jingujor FIR, ka la kyrpad ia u secretary shnong Lumshnong ban buh ia kane ka FIR mynta ka step. Na ka liang u Pulit ophisar jong ka Lumshnong Anti Dacoity Camp u la tohkit ia baroh arliang bad phah ia kane ka Kam sha ka Women Cell ha Khliehriat Police Station ba dei peit ia ki kam sniew ba leh pyrshah ia ki kynthei bad la ioh ia ka FIR NO: 143(7)14 bad pynngat ia une u David Khongsit ha ka kyndon IPC 354 kaba ia dei bad ka jingktah ka burom ki kynthei bad ka jingtohkit ka la nangiaid shakhmat.
Ha ka jingiohsngew u Secretary shnong Lumshnong, Ma S. Rupai, ia kane ka jingjia ba pynkhlemrain ia ka imlang sahlang lyngba ka jingtohkit u pulit ophisar, um sngewtynnad shuh ban don kum une u jaidbriew uba ktah ia ka burom ka ijot ki kynthei bad ruh ia ka burom ka shnong ka thaw. Bad u la pynrem jur ia kane ka jingjia.(SP News)