Shillong, Naiwieng, 13: U Myntri Rangbah ka jylla Meghalaya, u Conrad K. Sangma u la dep plie pyrda iaka bynta ba ar jong ka P.A. Sangma Memorial Football Tournament ha B.M. Model School Field, Bhaitbari kaba hap ha West Garo Hills.
Haba kren ha katei ka sngi, u Myntri Rangbah u la ai khublei iaki paidbah jong ka shnong Rajabala, khamtam ia u Myntri barim, u Abdus Saleh, na ka bynta ka jingsdang jong u ban pynlong ia kane ka prokram iakehkai ha ka jingkynmaw burom ia u Purno Agitok Sangma, bam kwai ha dwar u blei.
U la ong ba kaba kongsan ha kane ka prokram iakehkai ka long ba ym dei ba la pynlong ia kane dabu riew shimet, ka sorkar lane kano kano ka kynhun marwei. Hynrei dei ki paidbah kane ka thain kiba la iatylli lang bad ia bei tyngka mar T. 20 lak ban pynlong ia kane ka prokram. U la ai jingiaroh ia kane ka jingthmu jong ki.
U la kren ruh ha ka jaka ka kmie jong u, ki bahaiing ha sem bad ki kur ki jait jong u, ha kaba u la pynpaw iaka jingsngew nguh ia baroh na ka bynta ka jingkynmaw burom jong ki ia u P.A. Sangma bad pynlong ia kane ka jingialehkai ha ka kyrteng jong u.
U la iathuh khyndiat shaphang jong u Abdus Saleh ba u la dep iathuh ia u ba ha ka por ba u P.A. Sangma u la iakhun ha ka elekshon ba nyngkong ha u snem 1977, u la pynlong iaka jingialang shwa bad haba u la iohsngew ia kata, u Conrad u la sngewkmen bad u la pynlong ia kane ka prokram bad kane ka jaka kham kongsan.
U la pynkynmaw iaka jingiakren jong u bad u Abdus Saleh, ha kaba u la kylli ba kumno ka tnum jong ka skul ka julor, hato dei na ka jingwan lynshop u phria lane ka eriong ba jur. Hynrei u Abdus Saleh u la jubab ba kam dei na kine baroh, hynrei ka dei na ki paidbah kiba la kiew shalor tnum ban ioh peit iaka jingialehkai kynjat bol.
Haba u Conrad u la iohsngew ia kane, u la ong ba u sngewkmen ba ki paidbah ruh ki da thrang ban ioh peit ia kum kane ka jait jingialehkai bad ban jur ba dei ban don da ka jaka ba biang ba kin ioh peitkai.
U la iathuh ruh ba ka sorkar Meghalaya ka dang pyrshang ban kyntiew iaka kam ialehkai bad ki jingtei bad u la ong ba la don 50 tylli ki artificial turf ha ki jaka bapher bapher jong ka jylla, khamtam ha ki jaka ba long lum.
U la bynrap da kaba ong ba ka sorkar Meghalaya kala tei iaka lympung ialehkai kynjat bol ha ka nongbah Shillong kaba ka jinglah ban ngiam ki briew haduh 40,000 ngut.
U la pyntip ruh ba ki paidbah ba lada don kiba kwah ban iakren halor kino kino ki jingeh lane jingmut bad ka sorkar, ki lah ban phone sha u nombar jong ka CM Connect ha u 1971. U la ong ba kine ki jingiakren phone kila dep ban rekod bad la sngap da ki heh nongtrei bad ruh da u Myntri Rangbah ialade bad yn sa sngap ia kine ki jingeh baroh.
