Shillong, Naiwieng 13: Ha ka sngi Palei ka Jaiñtia National Council JNC Central Executive Committee, kaba la ialam da u President jong ka, u bah Sambormi Lyngdoh, ka la aiti daka jingthoh kaba kyrkieh sha u Commissioner bad Secretary, ka tnad Revenue and Disaster Management Department, ka sorkar Meghalaya hakaba iadei bad ka jingkylliang jaka Land transfer kaba heh bha kumba 232.899 hektar 2,328,990 square metre kaba hap haka shnong Umkyrpong, Elaka Sumer, East Jaiñtia Hills District.
Namar ba la iathuh ba u Commissioner bad Secretary um don ha ophis la aiti ia ka jingthoh lyngba ka ophis jong u ban leh iakaba donkam. Ka JNC, ha kine ki sngi ba ladep, ka lah pynpaw ia ki jingeh kiba jur ha kaba iadei bad ka jingthmu ban pynkylla ia ki jaka jong ki riewlum sha ki company ba nabar jylla, kynthup ia ka Shree Cement Limited. Hynrei kumba iuh tdong bseiñ la mih biang sa ka kam Umkyrpong ha ka juh ka kam pynkynriah jaka.
Kane ka jingthmu ban pynkynriah jaka kaba dei jong u Wom Chyrmang na ka Shnong Jalaphet, bad ban ai sha ka “Kopili Cement (I) Private Limited” kum ka nongthied iaka tei ka jaka kaba don ha ki ar tylli ki jingpynbna Form-D ba la pynmih daka ophis u Deputy Commissioner, East Jaintia Hills District. Kitei ki jaka kaba la buh lang haka notice la pyni ruh iaka dor Jong ki kumba ₹11.88 klur na ka bynta ki ar tylli ki parcel.
Ka JNC halor kane ka bynta ka la dep ruh ban pynpaw ha u Deputy Commissioner lyngba ka jingthoh ha ka 8 tarik u October 2026, da kaba kyrpad ba dei ban pynjlan ia ka jingtreikam, ban pynjlan ruh ia ka lad Form-D bad ban ai jingpynbna paidbah kham bniah khamtam haki khubor local katkum ka kyndon jong ka MLTR Rules 1974.
Ka JNC ka sngewkhia jur ia ka jingthmu ban pynkylla ia kum kane ka jaka kaba heh bha jong ki trai ri trai muluk sha ka kompeni shna cement kaba ka Council hi ka shim ba ka long kaba khlem nongrim bha, khamtam haba khein ia ki marpoh khyndew kiba lah ban don daki klur tyngka.
Ka JNC ka la ioh jingtip ruh ba kiwei pat ki trai Ri ki lah don ka jingkwah bad ka jinglah pisa ban thied ia ki jaka ba la kdew. Hynrei khlem ka jingpynsngew bad jingpyntip paidbah kaba biang, kumno kine ki briew kin wan shakhmat bad pyndonkam ia ka lad?
Lyngba ka dorkhas kaba kila ai ka JNC ka la kyntu jur namarkata ia ka tnad revenue ban, Pynsangeh mardor ia ka jingthmu ban pynkynriah bad kano kano ka sanction kaba dang sahteng haduh ban da bishar bniah ia ki jingeh ba la pynpaw katkum ka jingthoh.
Ban bthah ia u Deputy Commissioner ban pynjlan ia ka lad Form-D na ka bynta ka por ba biang. Pynthikna ban pynmih kham bun ia ki jingpynbna lyngba ki kot khubor jong ka thain bad kiwei kiwei ki jaka paidbah kiba lah ban ioh khnang ban pynmyntoi iaki trai ri.
“Lada ki briew jong ngi hi ki mon bad ki lah ban thied ia kine ki jaka ha ka dor iew kaba biang, balei kin shah pynduh ia kata ka lad tang namar ba kim shym la ioh jingtip kaba biang .
Kine ki jaka kim dei tang ki jaka ba kumto hynrei ki dei ba don marpoh khyndew jong ki briew jong ngi kiba shongdor da ki klur, kan jia aiu iaki pateng Jong ngi kum ia kine ki jaka kiba don ha ka ioh ka kot bad kiba ai jingmyntoi ia ngi, khlem da ailad shwa ïa ki briew jong ngi hi?” pynkut u President ka JNC u Sambormi Lyngdoh.
