Shillong, Naiwieng 13: Mynta ka sngi ka Indian Hotels Company Limited kala phah ia ka shithi sha u president ka seng HYC u bah Roy Kupar Synrem ban pan map ia ka jingbakla ha kaba kila kumthoh Barapani ha ka jaka ban thoh Umiam.
Ha ka shithi kaba la phah mynta ka sngi na ka liang jong ka IHCL kala kubor ia kaei kaba la mih ka kyrteng Barapani ha ka kyrwoh khubor kaba kila pynmih ha ka 12/Naiwieng/ 2026 kum ka jingpyntip ba kin sa ia soi ia ka soskular ban shna ia ka Taj Resort ha ka jylla Meghalaya.
Ka IHCL kala pan map na ka bynta ka jingthoh bakla iaka kyrteng “Barapani” ha ka jaka ba kin thoh Umiam, na ka liang jong ka kompeni ka burom ia ka jingsngew jong ki trai shnong bad ki riti dustur kaba ki don.
Kumta ka IHCL da kaba burom kala ithuh bad tip iaka ba iaka kyrteng “Umiam” kan pynneh pynsah namar ba ka long kaba ktah shibun iaki paidbah riewlum jong ka jylla Meghalaya.
Ka Umiam Hotels Private Limited ka kular ban burom iaka riti ka dustur bad kiwei kiwei kiba dei jong ka jylla Meghalaya. Haba kren shaphang kane, kala ong ba kane ka projek ka pyni jngai ym tang ha ka ban bei tyngka ha kaban tei iaka kam jngohkai pyrthei hynrei ban pyni ruh iaka jingriewspah kane ka jylla ha ka jingitynnad jong ka ha ka liang ka mariang bad kiwei kiwei ki jingitynnad jong kane ka thain.
Kala pynshai ruh na ka liang jong ka Umiam Hotels Private Limited kam ju don kata ka jingmut ban pynkylla iaka kyrteng jong ka Umiam. Ha ka jingshisha, ka kompany jong ki ka pynpaw iaka jingiadei kam bad ka jingburom iaka Umiam.
Kala pynsngew ia kane ka mat kaba la pynpaw da ka seng HYC bad kan sa shimkhia ia kane bad ka IHCL khnang ba ka kyrteng “Umiam” kan neh beit ha kino kino ki projek ban wan bad kiwei kiwei.
Kala don ka jingsngew na ka bynta jong ki paidbah kane ka thain bad kala kular ba kan iai bteng ban pynlong ia la ki kam ki jam da ka burom kaba khraw eh iaki briew, ka riti ka dustur bad ka jinglong jong ka Meghalaya.
