Yn pyntreikam ia ki CCTNS ha ki 96 tylli ki Police Station ha Meghalaya: DGP
Shillong K’Lyngkot 14: U DGP ka Jylla Kulbir Kishan hynne ka sngi u la pyllait paidbah ban pyntreikam noh ia ka Crime & Criminal Tracking Network and System (CCTNS) kaba dei ka mission mode projek hapoh ka National e-Governance ha Sardar Police Station. Lyngba kane ka tnat treikam ki briew ki lah ban ujor bad mudui ehjahar da kaba suk na la iing ba ki shong ki sah lyngba ki kor kompiwtor ka juk mynta ne ka Internet khlem da donkam ban leit sha Police Station.
Ka CCTNS kadei kawei na ki projek jong ka Sorkar Kmie kaba kwah ban wanrah ia ka jingiadei hapdeng ki 14,000 tylli ki police station jong ka Ri.
Kane ka projek kaba la kot sha ka 2,000 klur tyngka la mynjur ha u snem 2009. Bad ka thmu ban pyntreikam sha ki 35 tylli ki Jylla bad ki Union Territory.
Ha ka jingdon ki 96 ki police station ha ka Jylla, haduh mynta kane ka projek ka dang pyntreikam tang ha Sardar Police Station bad Laban PS ha East Khasi Hills bad Tura PS bad Dalu PS ha West Garo hills.
Haba plie ia kane ka projek, u Kishan ula ong ba ka CCTNS projek kan wanrah ia ka rukom treikam kaba paka na bynta ban wanrah ia ka jingtreikam kaba bha ha manla ki police station da kaba pyndonkam ia ka e-governance.
Katkum ka jngiathuh jong u Kishan kane ka projek kaba don ia ka jingthmu ban pyndon ia ka jingiadei kaba ia jan bad ki police station bad ki paidbah bad kaba khuid ba suba ba lah ban tip ha ka rukom treikam jong ki.
“Hapoh jong ka CCTNS projekki paidbah ki lah ban registar bad ujor ia ki ejahar lyngba ka internet khlem da donkam ban leit sha ki police station,” la iathuh u Kishan.
Une u heh pulit u la iathuh shuh shuh ba lyngba ka CCTNS lah ban ioh ia ki jingtip na bynta ka jingtohkit kaba bniah bad lah ban tehlakam ia ki kam sniew bad lah ban kem ia ki riewsniew.
Ha iadei bad ki jaka kiba dang sah u Kishan u la ong ba ia kitei ki 92 tylli ki police station kiba dang sah yn sa pymtreikam noh shen.
