Shillong, Naiwieng 12: Laitylli ki kot ba kongsan jong ka rikynti bad deiriti Khasi la pyllait ha ka sngi plie ia ka rong ka taw Shillong Literary Festival 2026 da u khlur nongthoh u Damon Galgut, u ba la jop ia ka Booker Prize 2021. Kine ki kot kin long ki ba la kyntiew ia ka thoh kot Khasi sha ka rynsan ba kham iar shuh shuh ha ka pyrthei. La kren lam khmat shaphang kine ki kot da u Raphael Warjri bad Kong Adeline Swer ban pynshai halor ki phang jong kawei pa kawei ka jingthoh jong kita ki kot, shwa banm plie paidvbah da u Damon Galgut.
Kine ki kot ba la pynmih ki long, ka Jutang Longblei: The Khasi Divine Covenant bad Khasi Matrilineal Clan Lineage System, da u Raphael Warjri, bad Matriliny versus Patriarchy, ka dei kaba la tih sani bad wad bniah da ka kong Adeline Swer ryngkat u Bah Raphael Warjri.
Ka kot Matriliny versus Patriarchy ka dei ka ba la jurip ia ka riti kheiñkur kheiñkha Khasi, da ka ba thwet ia ki nongrim bad ki thymmei pyrkhat shaphang ka riti tynrai ka ba iadei bad ka snap tynrai Khasi. Ka la tohkit bniah ruh ia ki jingeh bad ki diengpyngkiang ki ba lynsher da ka ba la tyllep da ki riti ba ker sawdong ban aijait sha u shynrang ha ka imlang sahlang Khasi. Kane ka wad bniah ka kdew ruh ia ki tyrko nia ki ba iai mih bad ki jingsngewkhia jong ki bynriew ia la ki paidbynriew bad ki kynpeiñ ki ba iai kynton ha ka syrwet lynti ban pynneh pynsah ia kine ki dustur barim ki ba iai kylla ha ka imlang sahlang.
Ka kot Jutang Longblei: Khasi Divine Covenant ka dei ka khanatang bad puriskam Khasi ka ba la syrdoh ter ter naduh ba sdang ban bud ryngkhi da ki khana katkum ki jingjia ha ka khanatang Khasi. Ki khana ki ba ia snoh ter ter katkum ki jingjia ki iathuh artat ba kumno ki kylla ban bteng kawei ka khana na kawei pat. La pathai ia kine ki khana da ka sur phawar Khasi ban pynneh pynsah ia ka tynrai bad ban pyniahap tar bad ka saiñpyrkhat Khasi. Kiwei kiwei pat ki surmyllung ba la thoh ki long ki jynthoh ba la thawhi da u nongthoh halor ka jingim ka riti Khasi bad ka imlang sahlang.
Ka kot ba khatduh ka dei ka Khasi Matrilineal Clan Lineage System, ka ba dei ban pathai satlak pyrthei ba la sot na ka kot MEI: Matrilineal Exogamous Institution ha ka ktien phareng na ka bynta ki Khasi ki ba shong ba sah sha shabar na u pud jong ka jylla Meghalaya. La pynmih ia kane ka kot 2025 da u Bah Pidison Suchiang, President ka Greater Sylhet Indigenous Peoples’ Forum, u ba la thmu ban pynphriang ka jingtip sha la ki paidbynriew Khasi ki ba shong ba sah ha ka Ri Bangladesh, khamtam ba ki dang ksoh la ka riti tynrai ban kheiñkur kheiñkha na ka kmie. Ka kot ba la pynmih ka thmu ban pyniar jingtip khnang ban sngewthuh ia ka riti da ka ba tip la ka tynrai riti dustur wat lada dei sha shiliang pud jong ka Ri, khnang ban syrpai ia ka jingiadei parakur patrakha shityllup ki paidbynriew Khasi ha baroh arliang pud jong ki artylli ki Ri.
Ka ba pyllait ia kine ki kot ha ka Shillong Literary Festival ka long ka rynsan ba kynsai ban pynphriang ia ka rikynti Khasi lyngba ka thohkot thohsla bad kiwei kiwei ki jingpyrshang ban kyntiew ia ka riti tynrai Khasi. Ka long ruh ka shlem ban kyrsiew ia ka mynsiem shitrhemn ia la ki paidbynriew ha ka ba pynneh pynsah ia ka snap tynrai Khasi ka ba iaineh barabor.
