Shillong, Lber 20: Ka seng Khasi Student Uinon kan sa rakhe ia ka jingdap 35 snem jong ka seng naduh ba la seng ia ka ha u snem 1978 da kaba kin pynlong ia ka jingialang hakhmat u mot sahkynmaw jong ka KSU uba don hajan ka All India Radio,Shillong.
Kum shi bynta jong ka jingrakhe ki nongialam ka KSU kynthup ia ki nongialam kiba rim kila buh syntiew ha une u mot bad la pynlong ruh ia ka jingsngap jar kaba shim init kum ka dak ban burom ia kito ki dkhot ka seng kiba la khlad ha ka jingialeh ban iada iala ka jaidbynriew.
U President barim jong ka Khasi Students Union(KSU) u Samla Samuel B Jyrwa uba long ruh u Chairman ka North East Students Organisation(NESO) ula ong ba ha ki 35 snem jong ka jingshakri ka KSU ia ka imlang sahlang katto katne ngut ki samla kila len iala ka jong ka jingim na ka byntya ban iakhun pyrshah ia ka jingshah thombor bad dei halor kane ka nongrim ba la seng ia ka KSU.
Une u nongialam ula ong ruh ba watla ka seng kala iakhun ha kine ki 35 tylli ki snem hynrei mynta ruh ka dang hap ban iakhun pyrshah ia ka sorkar ne ia kiwei pat na ka jingshah thombor la ka long ha kaban iada ia ka shyiap ka khyndew ne ha ka khaii ka pateng.
Nalor kane ula pynpaw ruh ia ka jingsngew burom ia ki samla kiba la mih shakhmat mynshwa ban ieng ban iada iala ka jaidbynriew bad ula ong ruh ba ka seng kadei ban iakhun tyngeh ban iatyllilang kum ka ri bad jaidbynriew bad ban klet ia ka niam kaba ki don.
U President jong ka KSU u bah Daniel Khyriem ula ong “Ngi dap da bun ki jingialeh ha man la ki liang bad ka seng kan iai ialeh ha kaba iadei bad ki ishu ban iada ia ka ri bad jaidbynriew bad nga pan ka jingkyrshan kaba radbah na phi ki dkhot ia ka rai kaba ka seng kan sa shim bad kawei na kine ki rai kadei halor ka jingiakhun ban iada ia ka ri na ka jingwan rung kyrthep ki mynder ri bad ki bar jylla ban dawa na ka sorkar ba kadei ban pyntreikam noh ia ka Inner Line Permit(ILP) ha ka jylla”.
Shuh shuh ula ong ruh ba la buh ia une u mot sahkynmaw 10 snem mynshwa haba ka seng kala dap 25 snem na ka bynta ban kynmaw burom khamtam ia kito ki dkhot kiba la aiti iala ka met ban mynsiem na ka bynta ka dawbah jong ka jaidbynriew bad ula ong ruh ba ki samla kidei ban mih shakhmat ban aiti ialade ban iakhun na ka bynta ka jaidbynriew. (SP News)
