Shillong Iaiong 17:Ka Grand Council of Chiefs of Meghalaya, (kaba kynthup ia Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ki
Sirdarship, Ki Dolloi) kan ia kynduh ha por 11 baje mynstep, ha 19 tarik (sngi Iewduh) April 2013, ha office Lumjingsuk, Demthring, Shillong ban ioh ia ka report halor ki kam kiba mih na ka shithi na ka tnad Ministry Home Affairs, Sorkar India, ba la phah copy da ki bor KHADC halor ka jingpynbeit thymmai ia kiba bun ki kyndon jong ka Sixth Schedule (6TH Schedule Amendment Bill 2012 ) jong ka Constitution Ri India.
Ha katei ka Dorbar yn ia kren ruh halor ka jingbuddien ia ka jingkdew jong ka Ministry of Home Affairs kaba la ong ha kitei ki shithi ‘ State Governments/Councils would be requested to initiate action for codification of traditional Laws” Ka long kaei kaei kaba ktah haba ngin shah pynkynmaw na ka Ministry of Home Affairs, (MHA) Sorkar India, ban ki Sorkar/Council kin pynsted ia ka jingthaw ain ia ki Riti ki Dustur.
Katei ka jingkdew ka long halor ka jingsahteng ban pynlong Ain/Act bad ban thaw ia ki Rule jong ki Dorbar Kur, Dorbar Shnong, Dorbar Raid bad Dorbar Hima hapoh Khasi bad Jaintia Hills District. ( Haduh kine ki sngi na ki 54 tylli ki Hima -kynthup ia ki 25 Khasi States-Ki bor KHADC ki dang dep shna 19 tylli ki Act Hima bad bun na kitei ki 19 tylli ki Hima kim pat don ki Rule – dang sah sa ka ban thaw Act bad ki rule na ka bynta 35 tylli ki Hima kynthup ia ki Act bad ki Rule jong ki Raid, ki Shnong bad khamtam jong ki Dorbar Kur. – Katba ha Jaintia Hills Autonomous District Council, ym pat don Act lane Rule na ka bynta ki 18 Elaka Dolloi bad kawei ka Sirdarship).
Ha katei ka Dorbar yn iakren ruh halor ka jingdonkam ia baroh ki nongmihkhmat jong ki Dorbar Kur, Dorbar Shnong, Dorbar Raid bad Dorbar Hima ba kin shim khia halor kitei ki jingkylla kiba ap bad ban pynkloi ban pyndep ban phah ia ki Riti pyniaid Kam jong ki ban phah sha ki bor MDC, bad District Council khnang ba kin lah ban mynjur bad pynlong Ain ia kitei ki Riti Pyniaid Kam.(SP News)
