Shillong, Naitung 04: Ka seng Congress kala tyrwa ia ka seng UDP ban ia treilang da kaba tyrwa ia ka shuki myntri rangbah sha ka UDP. Da kane ka jingtyrwa jong ka seng Congress ka thew shai kdar ba lada ka UDP ka pdiang kane ka sorkar kaba la ialam da ka NPP kan khyllem.
U Bah Allantry Dkhar u wei na ki nongialam jong ka seng UDP, haba kren ha u SP News Agency u la ong ba kane ka jingtyrwa jong ka seng Congress kala long naduh ba dang shudep ka election MLA shuwa ban thaw sorkar bad ia ka jingtyrwa ka seng kam shym la kren ei ei namar ka jingtyrwa ka sah hi ka jingtyrwa.
Na ka liang jong ka UDP kala rai ban ia treilang bad kane ka sorkar MDA kaba mynta kin nym kylla jutang. La ong ba ha kum kine ki por ki jingsuba ki don beit, hynrei na ka liang jong ka UDP ka shai ba kan ia treilang bad kane ka sorkar, la ong u Bah Dkhar.
U Bah Dkhar u la ong ba ia ki jingiakren ki briew sha rum shaneng ym don jingtip ei ei, namar kine baroh ki long tang ki jingsuba bad ki jingmut dur jong ki briew, hynrei na ka liang jong ka seng UDP ka skhem ba kin ia treilang beit bad kane ka sorkar synrop kaba mynta.
Kumba ka long mynta ka UDP ka don 6 ngut ki MLA bad da ka jingleit pyniasoh u MLA jong ka Mawphlang u Bah S K Sunn ka seng UDP kala don 7 ngut ki MLA ha ka iing dorbar kaba 58 ngut, namar ar tylli ki shuki MLA kila thylli da ka jinghiar shuki noh u Martin M Danggo na Ranikor bad ka Agatha K Sangma na South Tura.
