Shillong, Naitung 08: Ka jingkem masi jong ki shipai BSF na Hat Thymmai ka long man ka por hynrei ki nongkhaii masi sha Bangladesh na kane ka jaka kam sangeh. Ha ka sngi Saitjain ki BSF kila ioh kem 36 tylli ki masi katba ki nongkhaii beain ki dang pyrshang ban pynrung sha Bangladesh.
Na ka liang jong ki BSF kila shim jingkhein ba kine ki masi 36 tylli kila shong dor haduh T.12 lak tyngka. Ki BSF kila ong ba ka jingjyllei jong kane ka jingkhaii masi beain na kane ka jaka ka long ba ka dei ka jaka khlaw bad ha ka juh ka por ka dei ka jaka kaba khlem pat ker ksianar shiah.
Ka jingioh kurup jong ki BSF ia ki mar khaii beain sha Bangladesh tang ha ka shitaiew jong kane ka taiew ba la dep la kong kala kot sha ka T.54.4 lak tyngka bad kiba bun na kine ki dei ki masi kiba la kot sha ka 215 tylli. Ki jaka kiba jur eh kane ka jingiakhaii beain ki long na Tuka, Nayabazar, Lyngkhat, Umsiyam, Ryngkua, O P Shella kiba hap hapoh jong ka East Khasi Hills District , Muktapur, Lamasaki jong ka West Jaintia Hills District jongka jylla Meghalaya.
