Shillong, Naitung 10: Ka long ka sngi sah jingkymaw ha ka khana pateng ka thain Ranikor ha kaba da ki hajar ngut ki pa
idbah na kylleng ki shnong bad ki dong ba marjan ka shnong Ranikor ki la wan ban sakhi ia ka jingplie mawnongrim ia ka Ranikor Civil Sub-Division bad kumjuh ia ka ophis treikam jong ka hynne ka sngi ha Ranikor. Kane ka Civil Sub-Division ba thymmai kan kynthup ia 160 tyll ki shnong bad ka sorkar jylla lyngba u symbud myntri rangbah, u Bah Prestone Tynsong, ka la pyndep ia la kular ia kaba la khlei ha ka 12 tarik u Jylliew, 2018 ha ka sngi mynba u myntri rangbah ka jylla u Conrad K Sangma u la wan jngoh ia ka thain Ranikor.
Ka sorkar Meghalaya Democratic Alliance (MDA) ba dang saw bnai ka rta ka la plie ia kane ka Sub Division da kaba kyntiew kyrdan ia ka na ka Ranikor Administrative Unit (ia kaba la plie da ka sorkar MUA-II ha ka jingialam u Dr Mukul Sangma ha u snem ba la dep). Kane ka sngi ka long ka jingkmen kaba khraw ia ka thain Ranikor khamtam ia u MLA barim u Bah Martin M Danggo (uba dei mynta u Co-Chairman ka Meghalaya State Planning Board), uba la iehnoh ia ka jinglong dkhot na ka Ing Dorbar Thaw-ain ka Jylla ha ka 21 tarik u Jylliew.
Ha lyndet kane ka jingweng noh dalade hi u Bah Martin M Danggo ka la long jia hadien ba ka sorkar jylla ha ka 12 tarik u Jylliew lyngba u myntri rangbah ka la kular ban kyntiew iaka Ranikor Administrative Unit sha ka Ranikor Civil Sub-Division. Kane ka jingkular ka sorkar ka la pynlong ia ki nongkyrshan u Bah Danggo ban khylliap noh ia ka lama Congress (na kaba u Bah Danggo u la jop kum u MLA ha ka ilekshon 27 tarik u Lber) bad pyniasnoh sha ka National People’s Party (NPP), kaba lam khmat ia ka sorkar synrop MDA.
Kumjuh ki nongialam ka Ranikor Civil Sub-Division Demand Committee ki la pynpaw ka jingai khublei ia ka sorkar jylla bad ia u myntri rangbah u Conrad K Sangma. Lyngba u Bah Kitborlang Nongrem, ka Ranikor Civil Sub Division Demand Committee ka la ai burom ha u Bah Prestone Tynsong kawei ka sati ksiar. “Hadien ki dorkhas dawa Civil Sub-Division kiba bun tylli ha ka por ka sorkar MUA-II hynrei kim shym la urlong satia. Hynrei ka dei ha ka 25 tarik u Jymmang, ngi la leit ban ia kynduh bad u myntri rangbah ka jylla u Conrad K Sangma uba la shim khia ryngkat u Bah Prestone Tynsong bad buh ban wan jurip iaka Ranikor ha ka 12 tarik u Jylliew “, la ong u Bah Kitborlang, uba la khni iam da ka jingkmen ha ka por ba ai jingkren.
“Ka dei ka jinglen lade bad aiti lut u Bah Martin M Danggo ba kane ka Sub-Division ka la wan urlong bad shwa ba un poi sha ka jylli ka sain-pyrthei u la aiti lut ialade da kaba iehnoh ia ka kam kum u Housing Inspector ha ki snem 1992 – 1993 bad wan seng skul ha ka thain Ranikor. U la resain ia ka kam MLA mynta ka kynti ruh na ka bynta ka Civil Sub-Division ka long kaba donkam eh na ka bynta ki paidbah ka thain bad kane ka Civil Sub-Division ka dei jong ki paidbah “, la ong u Bah Kitborlang Nongrem uba la kyntaid ia ka jingkynnoh ba u Bah Danggo u la resain na kiwei pat ki daw ban ioh myntoi shimet.
U Bah MM Danggo ha ka jingai jingkren jong u ha ka jingialang, u la pynpaw ba kane ka sngi ka dei ka sngi sah khana pateng ia ka Ranikor. “Nga ai khublei ia ka sorkar jylla, ka kynhun myntri, u myntri rangbah u Conrad Sangma lem kiwei kiwei kiba ia don bynta ban pynioh ia ka Ranikor Civil Sub-Division, kaba dei ka lawei na ka bynta ki khun ki kti ha ka lashai la shi sngi. Nga la resain na ka jinglong MLA ban ioh ia ka Civil Sub-Division “, la ong u Bah Danggo. U la ong ba u don ka jingkyrmen ba ka Civil Sub-Division kan pynurlong ia ka jingktah ki paidbah katkum ki jingkhnih lynti jong ki.
Ha shwa ka jingkren u kongsan (Bah Prestone Tynsong) la pule ia ka Notification kaba la mynjur ban thaw ia ka Ranikor Civil Sub-Division da u Commissioner Secretary ka tnad Home & Political ka sorkar jylla, u Bah S Kharlyngdoh uba la aiti ia ka syrnod sha u Bah HS Diengdoh, kum u Sub-Divisional Officer na nyngkong ka Ranikor Civil Sub-Division. Nalor kiwei pat kiba la ai jingkren kynthup ia u myntri ka tnad pule, u Bah Lahkmen Rymbui, u myntri ka tnad ka koit ka khiah, u Bah AL Hek, u myntri kam pohing u James Sangma (kum u symbud kongsan) la ioh ruh ia ki program jingshad jingrwai na ki samla ka thain bad ki khynnah skul.
U Bah Prestone Tynsong haba ai jingkren kum u kongsan u la ong ba kane ka jinwan plie jong u ia ka Sub-Divison ka long naka bynta ka burom u myntri sorkar jylla u Conrad K Sangma bad kumjuh ka sorkar MDA hi. “Tang mar ia hiar ha kane ka jaka ngi la iohi ia ki paidbah kiba ap da ka mynsiem ka jingsngew kmen ban ioh ban plie noh ia ka ophis Civil Sub-Division. U Bah Danggo u la iathuh ia nga haka miet 21 tarik u Jylliew ba u la resain na ka kam MLA bad da ka mynsiem kaba sngew khia na ka bynta ki paidbah ka Ranikor “, la ong u Bah Prestone.
“Nga ong ia phi ki paidbah ba u Bah Danggo u dei ‘u Briew ka Ranikor’ bad uba don ka jingkit khlieh na ka bynta ka bha ka miat ka Ranikor Constituency”, la ong u Bah Prestone uba la bynrap ba na ka liang ka sorkar kan nang pynbit pynbiang ia baroh ki tnad treikam bapher bapher kiba dei ban don ha ka Civil Sub-Division. “Ngi iohi ba ka Ranikor ka dei kaba la shah ieh bein bad nga kren shai ba na ka liang ka sorkar ngin trei minot wanrah ia ka synshar paidbah kaba jan sha kawei pa kawei ka longing…..Ha kine ki bnai ban wan ngin lah ban pynurlong shuh shuh ia ka jingthrang bad angnud ki paidbah”, la ong u Bah Prestone.
Kiwei pat kiba la ia donlang ki kynthup ia ki myntri sorkar jylla, ki MLA kiba don ha ka sorkar MDA, u Bah Lambor Malngiang, Chairman ka Meghalaya State Planning Board, ki heh sorkar, ki nongkitkam bad nongialam ka NPP, ka Deputy Commissioner ka South West Khasi Hills District ka Kong Isawanda Laloo, u SP ka South West Khasi Hills u Bah Hebert G Lyngdoh lem bad kiwei kiwei pat.
