Shillong, Naitung 12: Ka drama sain pyrthei hapoh jong ka Khasi Hills Autonomous District Council (KHADC) kala kylla sted haduh katta katta ha kaba u Bah LP Nongsiej u la resign noh ka kam Chairman da kaba phah ia ka shithi sha u Secretary jong ka Legislative.
U Bah M Kharkrang Secretary jong ka Legislative jong ka KHADC haba kren ha ki nongthoh khubor mynta ka sngi u la iathuh ba u la ioh pdiang ia ka shithi resign noh jong u Bah LG Nongsiej kum u Chairman jong ka District Council bad ia kane ka shithi kin hap ban phah sha u Lat jong ka jylla ban pdiang ia ka shithi iehnoh kam.
Haba jubab ia ki jingkylli na ka liang jong u Secretary u la ong ba katkum ka jingthoh kaba don hapoh ka iing dorbar bala buh rekord ka long ba ha ka 10 tarik mynta u bnai u Chairman u la kren shai “ Ba ia ka iing dorbar la pynwai haduh bad a pynbna da kumwei pat”.
Hynrei mynta ka sngi na ka liang jong u Chairman u la ai ia ka jingpynbna ba ia ka iing dorbar la pynwai, kane ka jingeh kaba ki ia kynduh ha ophis mynta. Na ka liang jong ka ophis kan pyntip ia kane sha u Lat jong ka jylla bad kin ap ia ka jingbatai kumno ban leh ia kane ka kam.
Katkum ka jingpynbna jong u Lat ka jylla ka elekshon ban jied ia u CEM jong ka KHADC ka dei ban long mynta ka sngi ha ka por ar baje noh phai sngi bad ki candidate ki long u Bah HS Shylla na ka KHDA bad ka kong Grace Kharpuri na ka PDA. Hynrei mynta da ka jingbym don Chairman ka KHADC ka don ha ka jingeh.
Ha ka 10 tarik ba long dorbar na ka liang jong u Bah LG Nongsiej Chairman ba rim jong ka KHADC u la thung ia arngut ki MDC ban long ki panel Chairman, kita ki long ka kong Telinia Thangkhiew bad u Bah Albinus Lyngdoh.
