Shillong, Nailar 18: U symbut myntri rangbah ka jylla u Bah Prestone Tynsong mynta ka sngi u la hiar sha ka shnong Nongnah na ka bynta ban leit ban ialap elekshon na ka bynta u kyrtong ka seng u Martin M Danggo ha ryngkat ka jingiadon lang ki nongialam jong ka seng.
Ha kane ka jingialang paidbah, u Bah Prestone u la ong ba ki paidbah ki dei ban pdiang ia ki kam pynroi bad kim dei ban shah ialam bakla ha ki katto katne ki briew ba kwah ban pynsniewdur, u la ong ba ha ka por ba ialeh ban pynioh ia ka jylla Meghalaya baroh ki riewlum ha kane ka jylla kila ia treilang bad sa ioh ia kane ka jylla kumba ka long mynta.
U Bah Prestone u la ban jur ha kane ka jingialap elekshon ban kyntu ia ki paidbah ban wan lang kawei ban ia treilang na ka bynta ki kam pynroi, long kiba kylluid ka jingmud jingpyrkhat naka bynta ban kyntiew ia ka jylla Meghalaya ha baroh ki liang ha ki kam pynroi.
Ha kane ka sngi u Bah Prestone u la kren ruh kaba ia dei bad ki kam shongkai pyrthei namar kane ka dei kawei na ki lad ban kyntiew ia ka ioh ka kot bad ka South West Khasi Hills District ka don ia ki jaka kiba lah ban khring ia ki nongwan jngohkai pyrthei bad kane ka sorkar mynta kala pynkhreh ia ki skhim na ka bynta ban shna ia ki surok hapoh ka jingialam jong u Conrad K Sangma kumu myntri rangbah.
Ha kane ka jingialap elekshon la don lang u myntri ki kam karkhana u Bah Sniawbhalang Dhar, MDC jong ka Sohryngkhang u Bah Pyniaid S Syiem u president jong ka SWKH District u Bah Kitborlang Nongrem, u MLA barim jong ka Sutnga u bah Hopeful Bamo, Stephanson Mukhin bad kiwei kiwei ki nongkit kam jong ka seng NPP.
