Shillong, Nailar 22: Ka jingshna ia ka “ Inter State Bus Terminus” ha Mawlai Mawiongrim kaba la kot sha ka T.43 klur la bei pisa da ka North Eastern Council kala suki sha ba palat. Ka jingshna ia kane ka jaka ieng ki Bus ka long ban pynlait ia ka nongbah Shillong na ka jingkhap ngiah kali ha kane ka nongbah Shillong.
Ka NEC kala mang ia kane ka pisa T.43 klur na ka bynta ban shna ia kane ka jaka ieng ki bus ha u snem 2013 bad la buh ia ka thong ba ia kane ka jingtrei dei ban pyndep ha u snem 2015 hynrei haduh mynta kane ka jingtrei ka dang sah khlem pat lah ban pyndep wat la kala iaid ar snem na ka por kaba la buh.
Kat kum ki thymmei khubor kiba la ioh da u SP News Agency, la sngewthuh ba ka sorkar lyngba ka tnad kam kit kam bah kala buh thong ban pyndep ia kane ka jingtrei hapoh u bnai Nohprah mynta u snem, hynrei na ka daw jong ka jingsuki palat ka jingtrei kane ka jaka ieng ki bus ha Mawiongrim kan nym lah ban dep ha u bnai Nohprah.
Kane ka jaka ieng ki Bus kaba dang shna mynta ha Mawiong ka lah ban ngiam palat 150 tylli ki Bus bad ka jingthmu ka long ba baroh ki Bus kiba leit na kawei ka jylla sha kawei pat ka jylla kin ieng ha kane ka jaka bad kane ka long ban pynlait ia ka jingkhap ngiah kali hapoh kane ka nongbah Shillong.
