Shillong, Nailur 02: Halor ka jingkhang khyrdep noh ka Uranium Corporation of India Limited (UCIL) ia ki ophis treikam jong ka ha sor Shillong bad ha Wahkaji myn ha kine ki sngi, ka Khasi Students’ Union (KSU) ka dawa ruh na kane ka tnad treikam jong ka sorkar kmie kaba dei peit ia ki kam tih marpoh khyndew kiba long radioactive ba ka dei ban khylliap noh shi junom ia ka lynnong jong ka jingthmu ban tih ia u marpoh khyndew Uranium na ki thain West Khasi Hills, South West Khasi Hills bad kylleng ka Bri U Hynniewtrep.
Ka KSU ka dawa ruh na ka sorkar pdeng ha Delhi ba ka dei ban pynmih noh mardor ia ka hukum ban sangeh bad ban khang ia ka jingtih ia kino kino ki marpoh khyndew kiba long radioactive kum u Uranium napoh ka Bri U Hynniewtrep. Lada ka sorkar pdeng ka thmu beit bad ap beit kliaw kumno ban ioh khlong ia u Uranium na Ri Khasi ka mut kam dei shu ka sorkar kmie hynrei ka la dei ka sorkar kmienah kaba leh donbor ia ki Jaidbynriew rit paid bad ka bym don jingkitkhlieh na ka bynta ka ki riewlum kiba ka la pynkylla nong India naduh ki por mynshwa.
Lane lah ban ong ba ka khein ia ka Bri U Hynniewtrep ym kum ka shnong ba pura jong ka Ri India hynrei tang kum kata ka colony kaba ka lah ban leh donbor katba mon ha kano kano ka khyllipmat. Namar baroh kawei ka pyrthei ka tip bad ka ioh ia kiei ki jingma kiba ka jingtih ia u Uranium kan wanrah.
Lah ban sakhi ba bun tylli ki ri ki la khang khyrdep lut ia ki par tih Uranium ha la ki jong ki shnong namar ka jingwanrah ia ki jait jingpang kiba har rukom kiba lah ban hiar pateng haduh ki spah pateng ruh. Ym lah ban leh ruh ba ki ri kiba pawkhmat ki tih beit ia une u marpoh khyndew ba long Iakjakor tang na ki bynta ba shong shnong da ki jaidbynriew rit paid.
Ka nuksa ka long kum ha ri USA ha kaba ia u Uranium la khlong beit ha ka Navajo Nation kaba long ka jaka ba shong shnong ki trai ri trai muluk ka ri America kiba ju tip kum ki Native Americans. Kumjuh ruh ha Australia ia u Uranium la tih beit tang ha ki jaka ba shong ba sah da ki trai ri trai muluk ba la kylla rit paid kiba tip kum ki Aboriginals.
Ha ri India ruh ia u Uranium la khlong beit na ki jaka jong ki Adivasis, ki kynhun jaidbynriew kiba rit paid bad kiba dang sahdien haduh katta katta kum ha Jharkhand bad Andhra Pradesh. Lyngba ki jingiathuh khana jong ki Adivasis, ki lad pathai khubor bad kumjuh na ki social media la iohi bad sakhi haduh katno ka jingshyrkhei ka wan ha kito ki jaidbynriew ki ba shong shnong hajan ki par Uranium.
Jan baroh na ki ki long ki ba don beit ki jingpang ba har rukom bad ki jingduna ha ki dkhot met. Ym tang kata hynrei ka jingtih ia u Uranium ka wanruh ia ka jingkylla phet wir ki trai shnong na ki jaka jong ki kiba long nongkynti naduh ki por hyndai hynthai. Halor kitei ki nongrim la pynlong ia ka KSU ba kan pyrshah dohiap dohim ia ka jingthmu ban tih ia u Uranium na Ri Khasi naduh ki por 1993 haduh kane ka khyllipmat kaba mynta.
Ha kane ka jingiakhun jong ka seng ki dkhot ka seng ki la mad shibun ki jingkthang bad jingshah shitom kum ha ki snem 2009 bad kumta ter ter. Ki dkhot ka seng ki lah shah kthong kum ki ksew ha ki bor synshar ka sorkar jylla. La bun na ki dkhot ki la shah set byndi bad don bun ruh kiba la khrew ka met ka phad haduh mynta. La don ki dkhot ruh kiba lait salit na ki ktang suloi jong ki pulit ha ka jingshah kthong ka jong ki.
Ha ki por kiba mynshwa ka KSU kham bunsien ka ieng marwei ban pyrshah ia ka jingthmu ban tih ia u Uranium haba ka la don ka jingkynthoh na ki paradoh parasnam ruh ba balei ka KSU ka pyrshah ia ka roi ka par. Ki don na kitei ki parari kiba la ioh jingmyntoi na ka UCIL bad ki don ruh ki bym tip ia ki jingma ki ban wan lada tih ia une u marpoh khyndew.
Kine ki bym tip eiei ki la kynnoh ruh ba ka KSU ka shah ialam bakla halor ki jingma lada tip Uranium. Hynrei ha kane ka juk kaba mynta pat lyngba ka tecnology ki paidbah ki lah ban iohi kiei kiba jia ha ki jaka ba tih Uranium lada dei ha India ne wat ha ki ri kiba kiew ka roi ka par.
Khatduh ka KSU ka pynpaw biang ba ka seng lyngba ki dkhot ka long beit kaba la pynkhreh lypa ban ialeh pyrshah ia kano kano ka jingthmu ban tih ia u Uranium la ka wan ha kano kano ka por ruh. Ki dkhot ka seng ki kloi ban aiti ia la ka jingim ruh ban ialeh pyrshah ia ki tup ki man jong ki nongshun kiba thmu ban khlong ia utei u marpoh khyndew.
Hooid don kiba ong ba ki dei ban shah ban tih Uranium khnang ba ka ri India kan long kaba khlain ha ka liang ka pynmih bording bad ban shna kita ki bom nukliar, hynrei ka KSU ka ong ba na ka bynta ka jingmyntoi kiwei pat ki nong India ki Khasi kin hap ban shem lanot ne wad haduh ban duh jait ka long ka bym lah ban pdiang da leilei ruh em namar lada kim khein nong India ruh ka mut ka jingmyntoi ka dei ban long ka jingmyntoi jong ka ri India bad ka jingshem lanot ka mut kan dei ka jingshem lanot jong ka ri India baroh kawei. La ong u Bah Lambokstarwell Marngar President ka KSU ha ka jingpynlait khubor mynta ka sngi.
