Sohra, Nailur 08: Ka kynhun South East Khasi District Demand Forum (SEKHDDF) mynta ka sngi kala pynlong ia ka jingialang paidbah ha Rama Krishna Mission, ha Sohra ban ia kren halor ka jingdawa ban ioh ia ka South East Khasi Hills District kaba kila iaid sha khmat mynta.
Ha ka jingkren jong u Dr Donkupar Roy president jong ka UDP, u ba dei u Shongknor jong ka iing dorbar thawain ha kane ka jingialang, u la pynthikna ban ioh ia ka South East Khasi Hills District, lada kam long mynta u snem, kan long ha u snem ban wan.
U Dr Donkupar Roy, ha kane ka jingialang kaba la long mynta ka sngi u la iathuh paidbah ba shuwa ba un wan sha kane ka jingialang paidbah u la ia kren bad u myntri rangbah ka jylla kaei ka jubab kaba un ai sha ki paidbah bad na ka liang jong u myntri rangbah ka jylla u la ong, ia mynta u snem yn nym lah ban leh namar ka don ka jingduna pisa, kan long ha u snem ban wan.
Ha kane ka sngi u Dr Donkupar u la ong ka jingdawa ban ioh ia ka District kam dei kaba dang thymmai, ka dei kaba la slem, ha ka jingshisha ka Sohra kala juh ia ki ar tylli ki lad ban ioh District, ha ka por ba long myntri rangbah u Dr Flinder Anderson Khonglam bad ha ka por ba u hi u long myntri rangbah hynrei ha ka jinglyngkot ka por kim shym la lah ban pynurlong ia kane ka kam.
U Shongknor jong ka iing dorbar u la ong shuh shuh, ban ioh ia ka District kam dei kata ka jingbiang jong ki kyndon, ka shong ha ka rai jong ka sorkar, u la pynkynmaw ba ha ka por ba ki ia kren ia kane ka kam, u la ong ba ka Sohra kala biang na dong sha dong ban ioh ia ka District, hynrei la ong ia u Dr Don ap shuwa ma phi ai shu sha ngi ba dang duna na dong shadong dei na kane ka daw ba ioh shuwa, ka Khliehriat, Resubelpara, Ampati bad Mawkyrwat.
U Dr Donkupar ha kane ka sngi u la ong ha khmat ki paidbah ka daw jong ka jingbym ioh ia ka District ha kine ki snem kiba la leit noh, ka daw bah ka long ba ki tlot ha ka sian pyrthei,(Politically Weak). U la ong ba ka jingangnud ka jong u ruh ka long ban ioh ia ka District bad ka jingiakren ka long ia ka Sohra bad ia ka Mairang ba dei ban ioh ia ki District.
Ha kane ka jingialang, na ka liang jong nongmih khmat paidbah kiba la poi dei u bah Donevan Wanlang MDC jong ka Sohra bad ha ka jingkren ka jong u la ai ka jingkyrshan ia kane ka jingdawa, na ka liang jong u MLA ka Sohra u bah Gavin Miguel Mylliem wat la u khlem poi sha kane ka jingialang hynrei u la phah ktien ba u ai ka jingkyrshan ia kane ka jingpan ia ka District.
Ha kane ka sngi u bah Titosstar Well Chyne ruh u la ia donlang, ki riew rangbah kaneka thain kiba la ia don lang ki long ki khlieh nongsynshar shnong, ki nongialam seng bhalang na ka thain bad shibun ki long kimie ruh kila ia poi sha kane ka jingialang kaba la long mynta ka sngi. Ia ka jingialang la pyniaid da u bah Atiar Syiemlieh Chairman jong kane SEKDDF.
