Shillong, Nailur 
13: Ka tnad social welfare mynta ka sngi kala pynlong ia ka jingialang ha Main Secretariat ban ia kren kumno ban kyntiew ia ka rukom sam bam ban tei ia ka met jong ki khynnah ha kane ka jylla lyngba ka skhim jong ka sorkar pdeng kaba la tip kum ka “Rashtriya Poshan Maah”.
U Bah Tining Dkhar, u ba dei u Commissioner bad Secretary jong ka sorkar jylla ba dei peit ia ka tnad Social Welfare haba kren ha ki lad pathai khubor u la ong ba kane ka jingialeh mynta ban pynioh ia ki jingbam kiba tei ia ka met ka dei ka jingialeh jong u paidbah ia kaba yn sa sdang mynta u bnai.
Kane ka dei ka jingangnud jong myntri rangbah duh jong ka Ri India bad ia kane ka kam un peit hi bad ia ka kaiphod halor ka jingpyntrei kam ia kane ka skhim hap ban ai ia ka kaiphot man ka lai bnai sha u myntri rangbah duh jong ka Ri India. Ban pyntrei kam ia kane ki tnad sorkar kiba la ia shnoh kti lang nalor ka tnad Social Welfare, ka don sha ka tnad ka koit ka khiah, ka tnad sam um bad ka tnad pule puthi.
Ha jubab ia ki jingkylli u Bah Dkhar u la ong ba ka thong kaba kongsan eh ban iarap ban pynioh ia ki jingbam kiba tei met dei lyngba ka skhim sam jingbam jong ka ICDS ia kaba la sam lyngba jong ki Aganwadi Centre ha ki shnong ki thaw bad ka bam ja sngi na ka bynta ki khynnah skul.
U la ong ba ka jingsam ia ki jingbam ha ki Aganwadi Centre ka dei ban long 25 sngi ha ka shibnai bad lada don ki bym sam ki paidbah ki lah ban ai ka jingujor, kumba ka long haduh mynta kam shym don kano kano ka jingujor ha kaba ia dei bad ka jingsam ia ki jingbam lyngba ka jaka sam jingbam. Lada ki don ki jaka bym sam pyntip sha ka ka ophis ban leh ia kaba don kam.
Ban pynkhlain ia ka jingpeit bniah ha kaba ia dei bad kane ka jingsam jingbam yn ai ia ka smart phone sha baroh ki nongtrei ha ki Aganwadi Centre bad lyngba kane ka phone ki lah ban peit bniah ia ka jingtrei kam ka jong ki, lada ka jingtrei kam kam long kumba la bethah ka phone kan sa phah ia ka jingpyntip sha ka Server kaba la shna kyrpang na ka bynta kane ka kam ha kaba ki nongtrei kin nym lah ban thok.
La khot la wer ia baroh ki paidbah ban ia shnoh kti lang ha kane ka jingialeh ban pynlong ia kane ka jingsam jingbam ban tei ia ka met kaba jop. La ong kumba ka long mynta ha kane ka jylla Meghalaya kala jyllei bha ka jingduna snam jong ki briew ka daw ka long ba kam biang ka bam.
Ia kane ka jingialeh ban pynioh ia ka jingbam kaba tei ia ka met yn sdang mynta u bnai bad kan kut ha u snem 2022 bad hapoh kane ka snem dei ban kot ka jingsam ia ki jingbam tei met da 6% bad kane ka jingkiew ka dei na long 2% man u snem. Ha kane ka sngi la don lang ruh u Secretary ka tnad ka koit ka khiah u P Bakshi.
