Shillong, Nailur 14: Ka Khasi Students’ Union (KSU) Central Executive Council da kane ka kyrwoh ka pynpaw ia ka jingsngew bitar bad jingsngewsih halor ki jingjia ba dang shu dep jia dang shen ha ki thain khappud ha Ri Bhoi, West Khasi Hills bad West Jaintia Hills.
Kine ki jingjia kiba kynthup ia ka jingshah kem u Waheh Chnong jong ka thain hajan Block I bad ka jingshah pynpra ki iing ha khappud West Khasi Hills. Nalor kine, ki jingjia ba dang shen ha khappud Ri Bhoi bad Assam ki la pynmih ia ki ingkylli hato kaei kaba pynshlur ia ki bor sorkar jong ka Assam bad ki kynhun jong ka ban nud ha ka ban thombor haduh kata kata khlem da khein snep shuh ia ki paid Khasi bad ia ka sorkar Meghalaya ruh kumjuh.
Ha kine ki khyndiat taiew ha Ri Bhoi la sdang shwa da ka jingpynpra ia ka iing jong Shadalin Lyngdoh da ki pulit Assam. Hadien kane ki pulit Assam ki la pynpra wat sa ia ka iing skul ha Khlieh Umwang ba la tei lyngba ka skim sorkar pdeng bad ym na ka skim sorkar jylla. Halor kane ka seng ka pynpaw ba ki pulit Assam ki la iuhroit ia ka hok longbriew manbriew jong ki paid Khasi ba sah ha khappud wat haduh ba kim khein shuh ia ka sorkar pdeng bad sorkar Meghalaya.
Nalor kata kaba kham sngewsih bad ktah mationg haduh kata kata ia ka Jaidbynriew ka long halor ka jingshah pyniap u Rangbah Tyngshain Mukhim uba shong basah ha Khlieh Umwang. Une u Rangbah Khasi u la shah shoh ha ka 9/09/2018 ha Madan Umwang bad u la khlad noh ha 12/09/2018.
Hadein kane ka jingjia wat la ia ka FIR la buh ka ka Mawlasnai Police Outpost hynrei ki pulit Assam ki la thmu ban knieh ia ka met une u Rangbah ban leh post mortem sha Assam. Hadien ba la ioh ban leh ia ka post mortem ha Nongpoh Civil Hospital la ioh jingtip shuh shuh ba ia u briew uba leh ia katei ka kam bymman uba dei na ka Jaidbynriew Nepali la kem da ki pulit Assam. Ha ka jingsngew ka seng ia utei u briew uba kyrteng u Ramesh Thapa la dei ban aiti ha ki pulit Meghalaya namar ia ka FIR la buh ha ki pulit Meghalaya.
Ka seng halor kane ka jingshah pyniap u Tyngshain Mukhim kan pynlong da ka jingiashong kyllain myngor ha Parking Lot jong ka Additional Secretariat ha ka 19/09/2018 naduh ka por 11 baje mynstep haduh 03 baje nohphai sngi. Kumta ka seng ka iawer ia baroh ki paradoh parasnam kiba don ka jingkitkhlieh ia ka Jaidbynriew ba kin wan ia shim bynta lem ha katei ka sngi kum ka dak ban pyni ba ka jingim jong u Khasi kam dei kaba tad dor haduh kata kata ba lah ban shim ia ka ha kano kano ka por.
