Shillong, Nailur 17: Ka Seng Samla Seng Khasi Seng Kmie kaba long ka kynhun Niam jong ki Khun Samla Khasi ba dang ksoh dang bat ia la ka jong ka Niam Tynrai hapdeng ka Jaidbynriew Khasi shityllup, da ka mynsiem kaba sngewkmen ka pynbna iar sha baroh ki tnat Seng Khasi bad Seiñ Raij sawdong sawkun jong ka Bri u Hynniew Trep u Hynniew Skum ba kan ioh ban plie pyrda ia ka Aiom Lehkmen Seng Kut Snem 2018 ka ban sdang ha ka 18 tarik u Nailu, 2018 hapoh Lympug Weiking Jaiaw naduh kapor 11 baje mynstep.
Ha katei ka sngi u Nongialam ba Rangbahduh jong ka Seng Khasi Kmie I Bah D. Dkhar in long u kongsan ban plie ia ka pyrda na bynta kane ka Aiom Lehkmen 2018. Kane ka Aiom Leh Kmen kadei ka tamasa kaba la ju pynlong manla u snem da ka Seng Samla Seng khasi Seng Kmie hashuwa ban poi ka aiom Seng kut Snem da ka jingwan ban ia shim bynta lang na ki tnat Seng Khasi bad Seiñ Raij bapher bapher kylleng sawdong ka Ri Khasi.
Ha kane ka “Aiom Leh Kmen” ki nongiashim bynta kynthup naduh ki samla haduh ki khynnah kiba na kylleng sawdong ka Jylla lyngba ki jingialehkai ba bun jait naduh ka Rongbiria, mawpoiñ, ka rwai ka siaw, ka phawar, ki jingshad tynrai kumjuh ruh hapdeng kane ka tamasa kiwei kiwei ki jingialehkai kiba baroh ka pyrthei ka tip yn kynthuplang kum ka Football, Basketball, Badminton bad kiwei kiwei ki jingialehkai jong ki khynnah rit.
Ka jingthmu kaba kongsan ka long kum shi bynta ban wanrah ia ka jingia ithuh ithaw para riew seng bad ruh ban pyn iar ia ka jingnang jingtip kaba lah ban aibor naduh ki khun samla kumjuh haduh ki khynnah lyngba ki jing iashimbynta ha ki prokram bapher bapher. Kane ka Aiom Lehkmen kan kyntiew ruh ia ki jingialehkai tynrai u Khasi bad ruh kan pynbyrngia lyngba ki bynta bapher bapher kiba la hiar pateng naduh kulong kumah hapdeng ka Bri u hynniew trep u Hynniew Skum.
Kumta ka Seng samla Seng khasi Seng kmie ka khot ka iawer ia ki khun samla kynthei bad shynrang jong ki tnat Seng Khasi na kylleng sawdong ka Ri Khasi ba kin wan ban iashim bynta shit rhem khang ba ki jingthmu na bynta ba bha kinlong kiba iaid beit iaid ryntih kumba mut ba khan.
