Shillong, Nailur 24: Ka KSU South West Khasi Hills District Unit lyngba ka kyrwoh na u Samla Forwardman Nongrem, President jongka seng ka la ong ba ka jingkam jongka UCIL ba ka la iehnoh iaki projects ha Mawthabah kam mut ba iaka issue uranium la pynkut noh hapoh ka thain ne haka jylla Meghalaya ka dei tang ka kam pynthame paidbah.
Kine kiei kiei ki dei tang ki kam ban pynthame ia u paitbah khnang ba ka sorkar India kan ioh ban pyntreikam iaki Pre-uranium Mining projects hapoh ka jylla bad khamtam haki bynta jongka thain Wahkaji, South West Khasi Hills District.
Naka liang jong ka KSU ka kynnoh ba kine baroh ki dei tang ki kam pynthame bad pynbiej ia u paitbah kiba kum ka seng kim pat pdiang haduh mynta ba ka jingiehnoh jong ka UCIL ka dei ka jingkut jong ka phang uranium haka Thain.
Wat Lada ka UCIL kam don shuh hynrei kane ka dei tang ka Public Sector Undertaking ba hap hapoh ka Atomic Minerals Directorate ne hapoh ka Department of Atomic Energy ia kaba ngi tip shai ba kane ka Department ka dang don iaki ophis treikam jongka ha Shillong, Nongjri bad wat ha Wahkaji ruh.
Ym tang katta ka seng ka dawa nakhmat jong ka Sorkar Jylla ban wanrah iaka resolution hapoh jongka Assembly mynta ka session iaki ar tylli ki mat kiba iadei bad u uranium bad Kita ki long ” Ban dawa naka Ministry of Environment, Forests and Climate Change ba ka dei ban weng noh iaka Environmental Clearance ia kaba Kane ka department ka la ai ha u bnai December 2007 na ka bynta ka jingtih uranium ha Mawthabah bad Domiasiat.
Ka Sorkar Jylla ka dei ban shim ruh Daka resolution hapoh Assembly mynta ka kynti ban dawa na ka MoEFCC ba nangne shakhmat nalor kaba weng iaki clearance ba la ai na bynta ban ksam uranium dei ban nym ai Shuh ka Environmental Clearance halor ka kam tih uranium nangne shakhmat “.
Shuh shuh ka seng ka dawa naka sorkar bad ki Nongmihkhmat mynta ka session ba ki dei ” Ban dawa naka sorkar kmie ba ka dei ban wanrah daka resolution hapoh parliament ban pynbna ba iaka kam uranium la khang bad khylliap noh haka Thain jongngi “.
Lada ka sorkar Meghalaya kam pat lah ban leh ia kine ki jingdawa jongka seng bad lada ka sorkar India kam pat lah ban weng iaka Environmental Clearance bad ban pynbna lyngba ka resolution hapoh parliament naka liang jongngi ngim pat pdiang iaka jingkam jongka UCIL namar ka UCIL ka dei tang ka Corporation ba hap hapoh ka AMD bad ki sngew ban ong ba ka lah ban phet mynta bad wanphai biang ha Kano Kano ka khyllipmat ruh lada ka sorkar Meghalaya bad ki Nongmihkhmat kim lah ban leheiei mynta ka kynti.
Ka seng ka kyntu ruh iaka KHADC ba ka dei ban shimkhia ia kine ki mat shaka sorkar kmie bad sha ka Ministry halor kine ki mat. Ka seng ka kyntu iaki paitbah ka thain ba kim dei ban shah ialam bakla ha ka ktien kaba ong ” Ka jingiehnoh jong ka UCIL ka dei ka jingkut jong ka phang uranium “.
Ka seng KSU ka ong ba ki dei ban sngewthuh ba ka UCIL ka dei tang ka tnad bad ka donkam ba yn rat sa ia u diengbah ( Clearance haba iadei bad ka kam tih uranium bad ka AMD) khnang ba kan wanrah jingshngain ia ka lawei jong ka thain bad ka Jaitbynriew. La kyntu ruh iaki parari ba ki dei ban husiar namar ba dei ha kaba kum Kane ka por kan wan pynbiej da ka ba wanrah iaki pre uranium mining projects haka thain “.
