Shillong, Nailur 29: Mynta ka sngi la pynlait paidbah ha ka jingialang ha KHD Hall Mawkhar da u Bah Himalaya Shangpliang ia ka kot kaba la thoh da u Bah Drasting Marbaniang shaphang ka shnong Mawsynram ia kane ka kot la ai kyrteng ka “ Ka jingaisbun ka mariang ia ka shnong Mawsynram”.
Shuwa ba pynlait paidbah ia kane ka kot, ha ka jingkren lyngkot jong u Bah Drasting Marbaniang, u la ong ba ka jingthoh jong u ka long tang ha kaba ia dei bad ka shnong Mawsynram bad kane ka dei ka thup kaba nyngkong bad mynta u dang lum ban pynmih sa kawei pat ha kaba ia dei bad ka thain Mawsynram.
Ha kane ka kot kaba la pynlait paidbah mynta ka sngi, u la thoh ha kaba ia dei bad ka krem Mawjymbuin bad u la iathuh ruh ia ka jingiap noh jong u sahep Bilat namar ka jingleh bakla ka jong u da kaba bom ia u wei na ki maw ba don ha kane ka krem. U la thoh ruh sha phang ka Damum bad kaba kham phylla ka tei ka Khreng Khreng ba kumno ia kane ka jaka la ithuh naduh ki por ba ka sorkar Bilat ka dang synshar ia ka Ri India.
Ha kane ka juh ka sngi na ka liang jong u MLA u la pynlait paidbah ruh ia ka kali kit nongpang ia kaba la aiti sha ka seng MSWOS ba kin pyniaid ia kane ka kali na ka bynta ka jingmyntoi jong ki paidbah ha ka jingiadon lang ki dkhot ka seng bad ki riew rangbah ka thain.
