Shillong, Risaw 01: Ka RCLP bad UP School, Laitdiengsai ha kine ki sngi kala pynlong ia ka sngi burom ki Kmie ki 
Kpa jong ki Khynnah Skul ia kaba la tip kum ka ‘Parents’ Day Celebration 2018’ kum shibynta ban wanrah ia ka jing sngew jan bad ka jingiatreilang kaba kham janai hapdeng ki bor pyniaid jong ka skul bad ki kmie ki kpa jong ki khynnah skul.
Ha katei ka sngi la pynlong ia ka jingialang kaba iphuh iphieng da ka jing wan iashim bynta shitrhem jong ki Kmie ki Kpa jong ki Khynnah Skul Ka RCLP & UP School, Laitdiengsai ha ryngkat ki jing pynbyrngia kiba pynshohbiej khamtam eh ia ki Kynrem ki lyndan bad ki nong shah khot sngewbha lyngba ki programme ki bapher bapher na ki khynnah skul kynthup naduh ki jing shad tynrai,ki jingrwai bad jing shad ba kyrpang, ka jingialehkai Drama kaba la ktik jingmut shikatdei eh ba la pynkhreh da ki Past pupil bad kiwei kiwei de ki programme.
Ia ka jingialang ha katei ka sngi la plie pyrda da ka jingkren pdiang sngewbha da Head Teacher jong ka UP School, ha kaba la ioh ruh ia ka jingkren na u Rangbah Shnong Laitdiengsai bad kumjuh ruh na u Symbud Kongsan kata I Bah Labiangbha T. Tariang, BDO Mawkynrew C&RD Block bad ka jingkren ai khublei na I Fr. Velerian.
La pyn shongkun shuh shuh ia katei ka jingrakhe ia ka‘Parents’ Day Celebration 2018’ da ka jingiadon ryngkat lang u Bah Banteidor Lyngdoh uba long ruh u MLA/MDC jong ka Mawkynrew Constituency bad ha kajuh ka por u Myntri sorkar ba dei khmih ia ka Sports & Youth Affairs uba la long kum u Kongsan.
Haba ai jingkren kum u Kongsan ha katei ka sngi na ka liang jong U Bah Banteidor Lyngdoh u la pynpaw ka jing sngewnguh nyngkong eh ia u Blei Nongbuh Nongthaw uba la don ryngkat ha ka jingim ka jong u bad kumjuh ruh ia ki bor pyniaid jong ka RCLP & UP School, Laitdiengsai lyngba ka jingshakri ia ki para briew ha ka thian ban kyntiew ia ka pule ka dangle.
Ha kawei pat ka liang u Bah Banteidor Lyngdoh ula kyntu ia baroh ki kmie ki kpa jong ki khynnah Skul ba kidei ban ai ka jing iatreilang barabor bad ki bor pyniaid jong ka skul namar u la ong ba dei tang lyngba ka mynsiem jong ka jing ia treilang ba yn lah ban pyniaid shaphrang bad ban pynkiew arted ia ka pule ka dangle ha ki shnong ki thaw bad ha ka thain hi baroh kawei.
Ha katei ka sngi na ka liang ki bor pyniaid jong ka RCLP & UP School, Laitdiengsai kila aiti ruh ia ka Memorandum ha u Bah Banteidor Lyngdoh, MLA/MDC Mawkynrew Constituency na ka bynta ki katto katne tylli ki jing dobnkam jong ka skul ha kaba na ka liang jong u Bah Banteidor Lyngdoh MLA/MDC, Mawkynrew Constituency u la kular ruh ban shimkhia bad ban mang kyrpang ia ka pisa lyngba ka MLA Scheme na ka bynta ki jing donkam jong ka RCLP & UP School, Laitdiengsai.
