Jowai, Risaw 24: Lyngba ka hok ban ioh jingtip (RTI), ba la wad jingtip dang shen da u Reachingson Siangshai, u ba dei ruh u Vice President jong ka AJYWO Central Body na ka JHADC halor ka khaii khaba jong ki Non-Tribal hapoh u pud u sam jong ka JHADC, ka JHADC lyngba ka Taxation Office jong ka, ka la pyntip ba don haduh 2785 ki Trading License ba dang trei kam haduh ka tarik ba la pan jingtip, hynrei kaba phylla ka long ba ha ka jingwad bniah jong ka seng pat na ki kopy ai jingtip ba la ai sha u nongwad jingtip, la lap ba don tang 321 tylli ki Trading Licence kiba dang trei kam haduh ka tarik wad jingtip.
Ka don ka jingiapher n aka jingai jingtip ka JHADC bad na ka jingioh jingkheiñ na ki RTI kopy ba la ioh. Namar, kat kum ka jingai jingtip jong ka JHADC, lada kheiñ don haduh 2400 tam tylli ki Trading License ki bym shai ba balei kim wan pynthymmai shuh. Kane ka jingioh tip ka la pynshaiong ia ka seng. Ki don ruh shibun kiei kiei ki bym shai halor ka jingai tip jong ka JHADC halor ka Trading License. Kumta, ia kane, ka seng kan dang tih bniah bin pa bin ban lap shuh shuh ia ka jingshisha.
“Kumno kane ka lah ban long haba, lada peit ia ki dukan bad ki nongwan kamai Non-Tribal hapoh Jaintia Hills kin don da ki phew hajar tylli bad katba nangiaid ki sngi kiba kum kitei ki dukan bad nongwan kamai ki la nangbun nang bun katba ka jingdon jong kai Trading License pat kiba trei kam ki ki la dang duna nang duna lada shim kat kum katei ka jingai jingtip jogn ka JHADC” ong u Bah M H Dkhar President jong ka AJYWO Central Body.
“Kat kum ka jinglap n aka RTI, ka jingbym pyntrei kam pura jong ka JHADC ia ka aiñ ban teh lakam ia ka jingwan leh business jong ki Non-tribal hapoh u pud u sam jong ka JHADC, ka la wanrah ym tang ia ka jingduhnong kaba khraw ia ka JHADC hynrei ka ktah ruh shi katdei eh ia ki trai ri trai muluk”. Ong u Reachingson Siangshai, Vice President jong ka AJYWO Central Body.
“Ki don pat shibun ki jaka iew hapoh u pud u sam jong ka JHADC, ha kaba don shibun ki Non-traibal kiba leh business hynrei kaba lyngngoh, ka long ba kiba don Trading License ki duna bha. Kane ka pynmih ia ka jingkylli ba ka JHADC ka leh aiu la baroh shi katta? Bad shaei ka lawei jong ka Ri bad ka Jaidbynriew lada ka JHADC ka shu thiah sngi bad peit kai ia kine ki Non-Tribal ki ba wan leh business beaiñ katba ki mon ha Jaintia Hills”, ong shuh shuh u kyrwoh na ka seng.
“Halor ka rukom wan leh business jong ki Non-Tribal hapoh Jaintia Hills bad ruh halor kane ka ishu Trading License, ka seng ka dang wad jingtip shuh shuh ha ka rukom kaba kham bniah khnang ban lap shuh shuh ia kiwei kiwei de ki jnit ki jnat kiba iadei bad kane ishu shwa ban shim ia kiwei pat ki sien jam kiba tyngeh lada ki bor jong JHADC kim lah ban pyntreikam pura ia ka aiñ ba dei peit ia kane ka kam” ong biang u Bah M H Dkhar.
Ka seng ka la ong ruh bad kan san wad jingtip ruh, la kine ki Non-Tribal kiba wan trei wan ktah hapoh u pud u sam jong ka JHADC, ki don ne em ia ka Employees’ Service License.
“Ia mynta, ka seng ka dawa naka JHADC ba ka dei ban khynra noh ia ki Trading License bad ka Employees Service License jong ki Non-Tribal ba wan leh business bad wan trei wan ktah hapoh Jaintia Hills bad ruh ban khang lut ia baroh ki dukan bad jingleh business beaiñ jong ki Non-Tribal hapoh Jaintia Hills.” Ong sa u Reachingson Siangshai.
Ka seng ka la byrngem ba kan kan ym shong kli kti, hynrei kan nang iai tih bniah bad ruh iaid shakhmat ban leh da kaba tyngeh halor kane ka ishu tad haduh ban pynthikna ba ym dei ban don u weir u Non-Tribal u ban leh business bad wan trei wan ktah beaiñ hapoh u pud u sam jong ka Jaintia Hills bad ka seng kan sa wat shaduh Iinglieh Ingsaw ruh , lada jia ba ka JHADC kam trei la ka jong ka kamram ha ka jingiadei ban kane ka isshu Trading License bad ka Employees’ Service License.
