Shillong, Lber 08: U Lat jong ka jylla u Tathagata Roy haba kren hapoh ka iing dorbar thawain jong ka jylla Meghalaya haba sdang jong kane ka dorbar mang tyngka 2019-2020, u la pybna hapoh ka iing dorbar ba ia ka iing dorbar ba thymmai jong ka jylla yn sa sdang shna noh shem bad la mang ia ka pisa T.141 klur tyngka.
Haba ia dei bad ka bai bam jong ki khynnah pule kiba dei na ki thain khappud bad ka Bangladesh na ka liang jongu Lat ka jylla u la ong ba kane ka skhim kan dang iai beteng nalor kiwei kiwei ki kam pynroi kiba dei ha khappud bad kiwei ki ri.
Haba ia dei bad ka shong suk shongsain na liang jong u Lat u la ong haba shim kyllum ka jylla ka don ha ka jingshong suk lait noh tang ha ki katto katne ki bynta jong ki jingiakajia ha khappud ka jylla Meghalaya bad Assam, ia kine ki jingjia ruh la lah ban tem ban pynjai jai.
Na ka liang jong ki pulit jong ka jylla kila long kiba peitngor ban wanrah ia ka shong suk shongsain ha ka jylla. Na ka liang jong ki pulit kila dang pynkhlain ruh ia ka jingtrei kam ban ia khun pyrshah ia ki “Cyber Crime”.
Ha kane ka jingkren kaba la thoh kaba don ha duh 35 sla kaba la pule da u Lat ka jylla kumba shikynta, kala kren ia shibun ki kam kiba ka sorkar kan dang leh nangne sha khmat lyngba ki tnad sorkar bapher bapher.
