Shillong, Iaiong 14: Mynta ka sngi ha ka por kumba 2.30 baje noh phai sngi kala don ka jingkhi kynsan u erlangthari ha ka shnong Ummulong ha kaba bun bah ki dieng kila khyllem ha kane ka shnogn bad la don ruh ki iing kiba la shah rat ki tnum iing.
Ha kane ka jingjia jong ka jinglynshop jong ka Mariang, la ong ba kam shym la ktah tang ia kane ka shnong hynrei wat ka shnong Mukhla kaba don mar jan bad kane ka shnong ruh la ong ba kala shah ktah ha kane ka jinglynshop jong ka mariang.
Kat haduh ba thoh ia kane ka khubor ym shym la ioh jingtip ei ei ba kan don kano kano ka jingjia kaba sngewsih kaba ktah ia ka mynsiem briew. Na ka liang jong ki ki paidbah kila pyntip ia kane ka jingjia sha ki bor jong ka District Administration jong ka West Jiantia Hills District.
