Shillong, Jymmang 03: Ki ar tylli ki rai jong ka KHADC kita ban kyntiew noh ia ka dor bai Tradig Laisen khaii bad ban ia ka rukom ai ia ki Licence sha ki bar jylla ki dei ki rai ban pyniohnong hynrei kim dei ki rai ban iada lane ban pyrkhing ia ka jingioh lad jong ki bar jylla ban knieh ia ka lad kamai jong ngi ki trai jylla.
Lyngba ka RTI kaba la ioh na ka KHADC haka 02th Jymmang 2019, la ioh jingtim ba naduh u snem 2017 haduh 2019 ka KHADC ka la ai ia ki Laisen ba thymmai sha ki 410 ngut ki bar jylla ha East Khasi Hills District bad 164 ha Ri-Bhoi District, ia ki kot ki sla jong kine baroh ka seng ka dang pule bniah, ban tip hato ia ki laisen la ai hadien ba peit bniah bad bud ryntih ia baroh ki kyndon ba la kdew ha ka sectoin 3A jong ka “The United Khasi jaintia Hills District (Trading By Non-tribals) Regulation, 1954”.
Ki ba bun ki bar jylla ki ba khaii ha ka jylla ki hap ban siew bai sha na ka bynta ban ioh ia ki trading licence jong ki bad kim ym salia ban siew ia ka bai trading licence kaba kham heh tang ban ioh lad ban iai khaii.
Ka ba kham suk ia kine ki dukan ka long ban pynkiew ia ka dor ki mar ki mata, namar haduh mynta ha ka jylla ka jong ngi ngim pat lah ban the lakam lane ban regulate ia ki dor jong ki mar ki mata, la kynnoh u Bah Thomas Passah president Youth Wing jong ka KHNAM.
Ki don ki bynta ha sor Shillong khamtam eh ha iewduh bad kiwei kiwei ki jaka ha kaba ki la iohi ba ka jingbun jong ki bar jylla ki ba khaii ka long kaba sha palat, ka sub-section (e) jong ka section 3B jong ka “The United Khasi jaintia Hills District (Trading By Non-tribals) Regulation, 1954” kala batai shaikdar ba ka Executive Committee kadei ban buh lane kdew lyngba ki rule ba haduh katno tylli ki trading licence dei ban ai da ka KHADC hynrei ka jubab jong ka RTI ka ba ngi la ioh halor kane ka bynta ka batai ba ka EC jong ka KHADC kam shim la buh lane kdew katno tylli ki licence dei ban ai.
Ka KHNAM ka kam ruh ba la lap ruh ba shaw ban ai ia ki trading licence ka Trade department jong ka KHADC kam shim la peit bniah ia ki sub-section (b), (c) & (d) jong ka Section 3A “Conditions for granting or refusing a license” jong ka Trading By Non-tribals Regulation, 1954”
Kam don jingmyntoi shuh ban leit khynra ia ki dukan jong ki bar jylla bad ban khang ia ki tang shi kynta ar kynta lada ka KHADC kam shimkhia lyngba ki ain ki kyndon, ngi sheptieng ioh ka don ka khaii kaba sha lyndet jong kine ki bar jylla bad ki riew khwan myntoi. Hadien ba ki la ioh ia kine ki RTI na ka liang ka seng ngin hap ban jurip bad ka seng ka bthah ia baroh ki bar jylla ki ba ioh ia ka trading ba kidei ban wah ia ka copy jong ka licence ha bar dukan haba paw khnang.
