Shillong, Jymmang 05: Ka Special Assistance Scheme(SAS) ba ai ka Sorkar Kmie Sha ka KHADC Kam dei ban poi Sha ki personal account jong no re jong no ne ban pyndonkam bakla da mano re mano hynrei ka dei ban poi Sha ki Paidbah, ong u Bah Roykupar Synrem General Secretary ka seng HYC ha ka kyrwoh kaba la phah mynta ka sngi.
Ha kine ki snem kiba la leit la iohi ba Ka KHADC ka la paw ha ka jingshna ia ki ain iada Ri ki ban iada ia ka jaidbynriew Hynniewtrep. Hynrei Tang ar bnai ba wan ki MDC thymmai la iohi pynban ba ki ia knieh Pisa , Kane ka long kaei kaei ka bym lah ban pdiang bad Kane ka dei ka Jing niewbein ia ka jingangnud Jong ka jaidbynriew na ka KHADC, la ong u tei u nongalam ka HYC.
Ka jaidbynriew ka angnud na ka KHADC ba Kan wanrah ki ain ban iada ia ka jinglong ba kyrpang , ia ka riti dustur , ia ka khyndew ka shyiap, ia ki dorbar Trai Ri bad ba Kan bud dien ia ki bill ba ladep shna khamtam eh ia ka Khasi Lineage Bill bad kiwei kiwei ki Ain.
U Bah Synrem , u la ong, kim lah ban len ba tang shu wan ka EC Thymmai, Ki EM ka trade bad Labour ki la shim khia katto katne bad Don ruh kiwei kiba pyrshang ban treibha , hynrei ssngewsih ba ki Don pat kiba bun kam ha ka ia knieh Pisa bad ia knieh shuki . Ka Jingshlur Jong kine ki MDC ban ia knieh Pisa bad ia knieh shuki I’mat kadei na ka daw ba ki dang thmu bad ki sngew ba ki lah ban hukum ia ki officer ka council ban kin thep ia ka Pisa paidbah ha ki akkount jong ki Riew shimet.
Ka HYC ka dawa bad maham ia baroh ki MDC ba Ka Pisa Lyngba ka SAS kadei ban poi Sha ki Paidbah ym ha ki account Jong no re jong no Kumba long mynshwa . ka HYC kam tular tuklar mar katno ki ia Sam hynrei ki dei ban pyntikna ba Kan poi Sha ki Paidbah. Ka seng kan buddien ban pynthikna ba wat tang shityngka na ka pisa ba la mang ban pyndonkam ymdei ban rung ha ka akount jong ki riew shimet.
Ka seng ka kyntu ruh ia baroh ki MDC ba ki dei ban ia pynleit jingmut ban iada ia ka jaidbynriew habaroh ki liang da kaba wanrah ban shna ia ki ain bapher bapher bad ki polisi treikam bapher bapher ym ban ia bun kam ha ka jingiaknieh pisa ne pynkyllon shuki. Ka HYC ka kyntu ia ki MDC ban ia shna Ain iada Ri ym ban ia knieh shuki. Ka jaidbynriew ka Don Kam ia ki nongshna Ain ban iada ia ka Ri ym ia kiba buaid shuki, la ong u Bah Roykupar Synrem general secretary ka HYC, CEC.
