Shillong, Jymmang 13: Ka Seng Samla Pule ka Khasi Student’s Union (KSU) mynta ka sngi kala leit ban khang tala ia ka ophis treikam jong u Director jong ka North Eastern Indira Gandhi Regional of Health and Medical Sciences (NEIGRIMHS) halor ka jingkynnoh ba u ne u Director ba mynta u la leh meng sha palat haduh ba kala mih ki jingkynrum kynram hapoh katei ka jaka sumar jong ka sorkar pdeng.
Ka jingkynrum kynram hapoh katei ka Hospital kala paw pyrthei naduh ba ki doctor kila khot ia ka jingsangeh trei kam, ha kaba u myntri ka koit ka khiah jong ka sorkar jylla u Bah AL Hek khot ia ki Doctor ban ia kren bad ki ban kyntu ia ki ba ki dei ban sangeh ia ka jingiakhih ka jong ki, ha kaba ki Doktor kila pdiang ia kane ka jingkyrpad jong u myntri ka jylla.
Kane ka jingia kynad hapoh katei ka jaka sumar kam kut tang katta, ha kaba ka iing bishar ba don burom jong ka High Court jong ka jylla Meghalaya kala khot hajir ia u Director bad ia kiwei ki Doctor ba kin wan jubab hapoh ka iing bishar ia kaei kaba la jia hapoh ka tei ka jaka sumar jong ka sorkar pdeng.
Mynta ka sngi ka liang jong ka seng KSU, kala shim ia kane ka lynti ban khang tala ia ka jaka trei kam jong u Director jong ka NEIGRIHMS ban pynpaw ia ka jingpyrshah ka jong ki ia ka jingbym iaid beit hapoh kane ka Hospital jong ka sorkar pdeng kaba la buh kyrpang na ka bynta kane ka thaiñ shatei lam mih ngi jong ka Ri India.
