Shillong, Jymmang 17: U Chief Whip jong ka liang pyrshah mynta ka sngi u bah Process T Sawkmie u la leit ban jurip ia ka Inter State Bus Terminus (ISBT) kala don ha Mawlai mawiong rim ha kaba la don lang u Commissioner ka tnad ka kit ka bah jong ka sorkar jylla u Bah IW Ingty bad kum juh na ka tnad PWD.
Haba kren ha ki lad pathai khubor ha dien ba la dep ban jurip ia kane ka jaka sangeh ki Bus, u Bah Process u la ong ba ka don ka jingkymen ba la lah ban pyndep kloi ia kane ka jingtrei namar u Commissioner ka tnad kam kit kam bah u la iathuh ba ka pisa kala poi mynta ban pyndep ia ka. La ong ba ha kaba kut jong u ne u snem 2019 lah ban pyndep.
Na ka jingiathuh jong ki ophisar na ka tnad ka kit ka bah mynta ka sngi ka long ba ka jingtrei kala dep 80% bad kiba sah mynta sa tang 20%. Ka jingwan jong u ban peit ia kane ka jaka sangeh ki bus ym ba ka dei hapoh ka konstitwensi ba u mih khmat hynrei kane ka jaka kan iarap ia ka jingkhapngiah kali hapoh sorkar Shillong.
U Bah Process u la ong ba tang ki Bus kiba ieng mynta hapoh sor Shillong kiba leit na kawei ka jylla sha kiwei pat ki long palat ia ka shispah tylli bad lada la dep kane ka jaka ieng ki buh kan iarap shibun ban pynlait ia ka jingkhap ngiah kali hapoh sor Shillong.
Ha kane ka jaka nalor ki bus kan don ruh ka jaka ieng ia ki Taxi, ki Sumo ban kit ia ki briew kiba wan na ki Bus. Kane kan long ruh ka lad ai kam ai jam ia ki samla kiba la nang la stad jong kane ka jylla. Ha ka juh ka por ruh kin peit ba ki kali Tourist Taxi kiba wan na Assam kin ieng ha kane ka jaka bad kito ki ban leit shangkai kin hap ban shim ia ki taxi jong kaner ka jylla.
