Shillong, Jymmang 19: Ka KSU South West Khasi Hills District kam don jingartatien eiei ba ka jinglap ia ka song uranium ha Moreh ha ka jylla Manipur ka pyni shai ba ka don ka jingtih Uranium tuh na Meghalaya bad shalan tuh ia u uranium daka UCIL bad ka AMD na Shillong la kynnoh ka KSU.
Ka KSU ka ong ba kumba la paw ha ki la pathai Khubor kiba na sha bar ka jylla ka pyni ba ka song uranium ba la lap na Manipur ka thoh “Explosive No. 337/99% Proven 425. Volt 2014” bad ka don ruh iaka shap jonga UCIL bad jong ka tnad Atomic Minerals Directorate ba Don iaka North Eastern Region Headquarter ha Shillong.
Ka seng kam don Kano Kano ka jingsngewphylla namar dang haka snem ba la leit ruh la paw tyngkrein ba ka AMD bad UCIL ka pyndonkam iaki riew shimet kiba dei ki trai jylla ban ksam uranium ha ka thain Mawthabah da ka jingthmu ban ialam bakla ba ki paitbah kin nym sngewthuh iaki buit poh jongka.
Ka cabinet jong ka sorkar jylla naduh u snem 2016 ka la rai ban weng noh iaka rai Cabinet jong u snem 2009 cabinet na ka bynta ban mynjur iaka jing aiwai iaka khyndew bad 422 hectares ha thain Domiasiat bad Mawthabah jong ka South West Khasi Hills shaka UCIL na ka bynta ki pre-mining activities hapoh ka thain.
Ka KSU kala iohi ruh lyngba ki khubor ba ka UCIL ka la khang shipor iaka ophis naduh bnai Nailar 2018 hynrei kum ka seng ngim pat Lah ban shaniah ia kane ka jingkam ka sorkar bad ka UCIL namar na ka por sha ka por ka ju ialam bakla iaki paitbah ka jylla da kaba ong ba ki khlem ktah ia u uranium hynrei ki kam pat ki paw da kumwei kumba la paw shai daka jinglap ia une u mar ba la shu khaii tuh daka UCIL na Shillong sha bar jylla bad bar ri.
Ka seng ka kyntu iaki paitbah ba kim dei ban shaniah iaka UCIL halor kane ka mat namar ka UCIL ka long kum ka shymprong ba ka shu kynriah da dien ban nym sngewthuh shano ka mut ban leit.
Ka KSU ka dawa naka sorkar ba ka dei ban pynshitom iaki briew jongka UCIL bad ka AMD namar ka jinglap ia kane ka song na Manipur kaba don iaka shap na Shillong ka pyni ba kim khein snep iaki rai jongka sorkar jylla bad ruh iaka rai jongka Executive Committee jongka District Council ha u snem 2017 ba ki kam ba iadei bad u uranium ym dei ban leh khlem ka jingtip jongka KHADC.
Ha kajuh ka por, ka seng ka dawa ruh naka sorkar bad ka KHADC ba kam dei ban pynpaw ba ki pyrshah uranium tang hapoh jylla hynrei ki dei ban rah ruh Shaka sorkar kmie ba ka dei ban pynbna ba iaka lynnong uranium la khylliap junom napoh ka jylla Meghalaya. Ym tang katta ka sorkar jylla bad ka District Council ba ki dei ban leit tied iaka jingkhang jongka Ministry of Environment, Forests and Climate Change ba ka dei ban weng noh ia ka Environmental Clearance ba la ai na ka bynta ka Open Cast Mining ha Domiasiat bad Mawthabah ha u snem 2007 bad ruh iaki Environmental Clearances ba ki la ai ban ksam uranium ha kylleng ki jaka jongka jylla.
Lada u Purno Sangma bam kwai ha dwar u blei uba dei u kpa jong u Chief Minister ba mynta ka jylla u lah ban pynkhih iaka Standing Committee jong ka MoEF ban nym ai Environmental Clearance ia ka AMD ban ksam uranium ha Balphakram National Park ha u snem 2010 , ka seng ka dawa namar kata ba u Conrad Sangma u dei ban leh kumjuh na bynta ki paitbah jong ka South West Khasi Hills District, ong u samla Forwardman Nongrem, President, KSU South West Khasi Hills District.
