Shillong, Jymmang 21: U National President jong ka seng National People’s Party u Conrad K Sangma u ba dei ruh u myntri rangbah jong ka jylla Meghalaya, u la pynrem jur ia ki riew sniew kiba la siat iap ia u MLA jong ka party u Tirong Aboh bad hynriew ngut kiwei pat ha ka shnong Bogapani jong ka Tirap District jong ka jylla Arunachal Pradesh.
Na ka liang jong ka NPP ka pynrem jur ia kane ka jingshim noh jong ki riew sniew ia ka jingim jong u MLA jong ka NPP, ha ka juh ka por u la dawa na u myntri kam poh iing jong ka Ri India u Rajnath Singh bad na u myntri rangbah duh jong ka Ri India ba dei ban thewt bad pynshitom ia kine ki nongleh kam sniew.
Ha ka kyrwoh kaba la phah da u state President jong ka seng NPP jong ka jylla Arunachal Pradesh u Gicho Kabak u la pynpaw ia ka sngngew kyndit ha kaba ia dei bad kane ka jingjia kaba sngewsih kthang ha kaba u MLA jong ka NPP u Tirong Aboh bad hynriew ngut kiwei pat kila shah sait iap kynthup ia ar ngut ki pulit pahara ha ka shnong Bogapani kaba hap hapoh jong ka Tirap district ha Arunachal Pradesh ha ki suba lehnoh.
Na ka liang jong ka NPP ka dawa ia ka sorkar jylla bad kum juh ia ka sorkar pdeng ba ka dei ban thwet tyngeh bad ban pynshitom ia kito kiba don kti ha kane ka kam pyniap dusmon ia u MLA u Tirong Aboh bad kiba ha iing jong u kiba ia don lang.
U Aboh u dei u MLA jong ka NPP na ka Khonsa West assembly constituency u ba la ia lehbiang ia ka election MLA na katei ka juh ka konstitwensi. Na ka liang jong ka NPP ka phah ia ka khubor sngewlem sha kiba ha iing ha sem bad duwai ba u blei un ai ka jingjah thait ia ki mynsiem kiba la khlad noh.
