Shillong, Jymmang 22: Ryngkat bad ka pyrthei baroh kawei ka jylla Meghalaya ruh mynta ka sngi kala rakhe ia ka jingdon kam ban pynneh pynsah ia ki khlaw ki betap bad ka phang pdeng jong ka jingrakhe mynta u snem ka long “ Ki khlaw ki betap dei ka bam bad ka koit ka khiah”. Ia kane ka jingialang la pynlong ha Soso Tham Auditorium Shillong da ka Meghalaya Biodiversity Board jong ka sorkar jylla.
Ha kane ka sngi u myntri ka tnad khlaw jong ka sokar Meghalaya u Bah Lahkmen Rumbui u la long u kongsan, la pynlong ia kane ka sngi, ban hikai sha ki paidbah ia ka jingriew spah jong ki khlaw ki betap ha kane ka jylla bad kumno ban pynneh pynsah ia ki.
U myntri kam khlaw, u la ban jur ban pynneh pynsah ia ki khlaw ki betap khnang ba ka mariang kan neh kan sah namar ka don ka jngiadei ha pdeng ka mariang bad u khun bynriew kine ki don ka jingiadon kam kaba mar kylliang, u myntri u la kyntu ban shim ia ka jingkular ban pynneh pynsah ia ka mariang.
Ha kane ka sngi na ka liang jong u myntri u la pynpaw ia ka jingsngew diaw ka jong u ban iohi ba bun ki jingthaw ba in kila dang duh jait, ka long kaba don kam ban pynneh pynsah ia ki jingthaw ba im bad lada ki jingthaw ba im kila sdang ban duh jait kane ka long ka dak jong ka jingma ia ka mariang bad ia ka pateng ban wan.
Ha kane ka sngi la pynlait paidbah ruh ia ka kaiphot ha kaba ia dei bad ki khlaw ki betap bad ia ki khlaw kur khlaw syiem bad ia ki jingiakop shondur bad ka jingiakop thoh ease bad ka phlim balyngkot halor ka shnong Mawlyngbna, ha shuwa ia kane ka u Secretary ka Meghalaya Biodiversity Board, u M. B. K. Reddy u la kren halor ka jingtrei kam jong ka board bad kiba la ia don lang ki long u PCCF bad HoFF, Meghalaya, u C. P. Marak bad PCCF (T), Meghalaya, ui Y. Shullai.
