Sgillong, Jylliew 04: Ia ka World Environment Day la rakhe mynta ka sngi ha NEIGRIHMS da ka Tnad Hospital Administration ryngkat ka jingiatrei lang bad ka Junior Chamber International (JCI) OPD jong ka Hospital ha kaba ki nongpang, ki nongap ia kiba pang, ki Doktor bad ki paramedics ki la ia snoh kti lang ban rakhe ia ka prokram.
Haba kren ha katei ka prokram, U Director ka NEIGRIHMS, u Prof (Dr.) D. M. Thappa, u la ban khia ha ka mariang ka ba lait na ka plastik bad kyntu ia ki nongshim bynta ban rah ia ka khubor ban kiar na ka jingpyndonkam ia ki plastik ha ka jingim ba man la ka sngi. U Deputy Director, u Bah D. Umdor u la kren shaphang ki katto katne ki lad kiba ka NEIGRIHMS ka shim ban pynsngewthuh ban pynduna ia ka jingpynjaboh ia ka mariang hapoh bad shabar ka Hospital.
U Prof. Noor Topno u la kren shaphang ka jingdonkam ban rakhe ia ka World Environment Day. U la ong ba ia kane ka sngi la rakhe ban pynsngewthuh shaphang ka jingktah jong ka jingpynjaboh ia ka mariang. U Dr. Tej Wundawalli Asst Professor na ka Tnad Hospital Administration u la ai ka PowerPoint Presentation bad ka documentary, kaba la pdiang sngewbha da ki paidbah.
Ka President ka JCI, ka Soni Bhoot bad u Harish Jhunjhunwala ki la ai jingkren ruh ha katei ka sngi bad ai jingmut ban pyndonkam da ki tiar ki tar ba pyut ha jaka ha plastik ha ka jingim ba man ka sngi. Ia ki borti rong bneng (blue) bad rong jyrngam ban lum ia ki niut na iing la aiti ruh ha u Chief Sanitation Officer da u Direktor bad Medical Superintendent ka NEIGRIHMS ban sam sha ki longiing ha NEIGRIHMS.
Ka la don ruh ka jingthung dieng ha phyllaw jong ka NEIGRIHMS ha kaba u Director, Deputy Director, Medical Superintendent bad ki dkhot ka JCI ki la thung ia ki dieng. Palat spah tylli ki tynrai dieng la thung ha kane ka phyllaw ha kane ka sngi.
