Shillong, Naitung 16: Ki nongialam jong ka KSU West Khasi District mynta ka sngi kila leit ban ia kynduh ia u myntri ka tnad ka koit ka khiah jong ka sorkar jylla u Bah Alexander Hek ban ia kren halor ki jingdon kam hapoh jong ka NOngstoin Civil Hospital kaba dang duna ha kiba bun ki liang.
U Samla Franklin Syiemiong President jong ka KSU West Khasi Hills District, u la ia thuh ba ha kane ka jingiakynduh ia u myntri ka koit ka khiah jong ka sorkar jylla na ka liang jong ka seng kala dawa ba ka sorkar ka dei ban pynbiang ia ki nongtrei hapoh jong ka Nongstoin Civil Hospital.
Ki jinguna hapoh katei ka Hospital ki long, naduh ki nongtrei haduh ki Doctor, ka jingbym biang ki kor ki bor, kyntup ia ka X.Ray Mashin, ha kaba ka seng kala dawa ba dei ban non ia ka City-Scan bad kum juh ia ka Ultrasound mashin, ka light bad ban plie noh ia ka Blood Bank.
Ka seng kala kyntu ruh ia ka sorkar ba dei ban pynkhreh noh ban plie ia ka jaka hikai ia ki Nurse GNM hapoh Nongstoin namar ka jingtei ia ka iing la jan dep bad kum juh ia ka jaka sumar ia ki long kmie bad ia ki khyllung.
Halor kitei ki jingdawa jong ka seng, na ka liang jong u myntri ka koit ka khiah u la pynsngew sha kine ki nongialam ka KSU ba ka sorkar kan dang pyrshang ban thaw shuh ia ki kam ban pynbiang ia ki nongtrei ha katei ka Hospital, bad ia ka X-Ray Mashin kaba la rim kin wanrah noh da kaba thymmai.
Haba ia dei bad ka jaka sumar ia ki long kmie bad ki khyllung na ka liang jong ka sorkar mynta kala don ka jingpyrkhat ba ia kane yn aiti sha ki hospital kiba la kham tbit ia kane ka kam ba kin pyniaid namar ka eh ia ka sorkar ban ioh ia ki briew kiba tbit. Haba ia dei bad ka jaka pule jong ki Nurse GNM kaba dang tei mynta la ong ba ka sorkar ka shem jingeh ban ioh nonghikai ia mynta.
Ha kane ka juh ka sngi la ia kren ruh halor ka Library ka don ha Nongstoin ia kaba ym don briew shuh ban peit ia ka, na ka liang jong u myntri u la ong ban sa thungnoh ha kaba ia dei bad ka iing yn bethah ia ka tnad Art but Culture ban pynkhreh ia ka skhim.
