Shillong, Nailar 27: U myntri rangbah ka jylla u Conrad K Sangma u ba dei ruh u Chairman jong ka sorkar Meghalaya Democratic Alliance (MDA) u la iathuh ba ka jingialang jong ka MDA kaba la ia shong mynta ka sngi ban ia kren ia ka kam speaker kala shim ia ka rai ban thaw da ka “Core Committee” ban jied ia u kyrtong Speaker.
Haba kren ha ki lad pathai khubor ha dien ka jingialang u la iathuh ba ha kane ka jingialang baroh ki party kiba don ha ka sorkar MDA kila ia poi lang bad la jied ia u bah Prestone Tynsong Deputy Chief Minister ba un long u Chairman jong ka Core Committee.
Kiwei ki dkhot jong kane ka Core Committee ki long u Bah Metbah Lyngdoh na ka UDP, u bah Banteidor Lyngdoh na ka kynhun UPF bad u Bah AL Hek na ka party BJP. Kane ka committee kan jied ia u kyrtong bad kan wan rah ia ka kyrteng jong u kyrtong speaker ha ka 4 tarik Nailut.
U Myntri rangbah u la iathuh ba ha kane ka jingialang jong ka MDA mynta ka sngi kila shim ia ka rai ba ia ka ilekshon Speaker yn pynlong ha kane ka dorbar synrai kaban wan bad ia ka tarik ka shong ka BAC ban buh ia ka sngi.
