Shillong, Risaw 02: U Myntri rangbah ka jylla u Conrad K Sangma mynta ka sngi u la pyndon burom ia kane ka sngi kha ba 150 snem jong u kpa ka jaidbynriew u Mahatma Gandhi da kaba buh syntiew ha u mot jong u ba don ha phyllaw jong ka Main Secretariat Shillong, ha ka jingiadon lang ki ophisar jong ka sorkar jylla.
Ha ka jingkren jong u myntri rangbah u la ong ba ha ka por ba dang don ha pdeng ka jingialeh laitluid jong ka Ri, kala don ka jingkhot hato long ne em kiba la kloi ban aiti iala ka jingim namar ka Ri, mynta ka jingkhot ka long hato long ne em kiba la kloi ban im namar ka ri da kaba leh ia ki kam na ka bynta ka jingmyntoi jong ka Ri.
Ha kane ka sngi u la kyntu ruh ia ki paidbah nongshong shnong jong ka jylla baroh kawei ban ialeh pyrshah ia ka jingpyndon kam ia ki plastik, na ka liang jong ka sorkar kala khang ban pyndon kam ia ki kynja plastik ha ki ophis sorkar bad kum juh ia ki bitor um plastik, la long ba kane ka dei ka jingialeh.
Ha kane ka jingialeh mynta ka sngi ha ka jylla baroh kawei la lum haduh 70 metrik tone ki plastik kiba lah ban pyndon kam ia ki. Ka sorkar kala don ka jingiakren bad ka kompeni shna pynmih dewbilat ka Dalmia Cement ba kan shim ia ki ha kaba kan pyndon kam ia ki ban pynmih bor ding.
Ia kane ym leh hapoh ka jingpeit jingkhmih jong ka Meghalaya Pollution Control Board ba ha kane ka jingpyndon kam ia ki plastik kan nym don kano kano ka jingpynjaboh ia ka mariang.
